Shna biang ia ka skul Sabuda:HSPDP

Shillong, 13 Nailar:
Ka HSPDP mynta ka sngi ka la aiti shi khung ki mat ha kti u Myntri Rangbah ka jylla u Dr Mukul Sangma kiba iadei bad ka jylla kynthup ka jingdawa ban shna biang ia ka iing skul ba la pynpra ka Assam ha Sabuda, ha RiBhoi.
Ka seng ka la maham ba lada ka sorkar kam lah ban pynurlong ia ki jingdawa kumba la angnud da ki paidbah, kan sa pynlong ia ka jingiakhih kaba tyngeh.
Hapoh ka jingialam u Vice President u Bah Ardent M Basaiawmoit ka seng hynne ka la kyntu ba ka sorkar kam dei shuh ban shu lap miet ban iakren pynbeit noh ia u pud u sam hynrei ban pyni da ki kam. Ka la dawa ruh ba ka sorkar ka dei ruh ban pyntreikam noh ia ka inner line permit (ILP), bad ban sangeh shi syndon ia ka National Population Register (NPR) ba khlem pat biang ki ain ki kanun ki ban lah shisha ban tehlakam ia ka jingtuid ki mynder sha ka Jylla.
Ka HSPDP ka ong ba ka long khlem rain ia ka jylla ba haduh 41 tylli ki snem khlem lah ban iapynbeit ia u pud u sam.
Ka HSPDP ka la ong ruh ba ka jingshah pynpra ka skul SSA kaba don ha Sabuda ka dei ka dak jong ka jingwan skud jaka ka Assam.
“Kane ka dei ka dak jong ka jingma kaba khraw ia ki briew kiba shong ba sah ha khappud bad kam lah ban shu sngap ne ban peitkai hynrei ka sorkar ka dei ban pyndep noh ban pynbeit ia u pud u sam”, la ong ka dorkhas ka HSPDP.
Ka HSPDP ka la dawa ba ka sorkar ba ka dei ban sdang biang ban tei ia ka skul SSA kaba la shah pynpra ha ki pulit ka Assam ha Sabuda, Umwahriang, Ranikhat bad ka Hat ha Langpih.
Ka dorkhas jong ka seng ka la dawa ruh na u Myntri Rangbah ba u dei ban shim khia ban pyntreikam noh ia ka ILP kumba la mynjur da ka High Level Committee ba la khlieh da u Symbud Myntri Rangbah barim u bah Bindo M Lanong.