Thiah surok 3ngut ki rangbah, bym ioh hotel ha 9lad

Shillong, 17 Jymmang:
Ka don ka ktien, kaba ong “Long mraw ha Ri lajong” hynrei ha kane ka jingjia, kaba mynta, ka wan da kumwei pat bad kata ka long “Ym don iing sah ha Ri lajong” bad katei ka dei ia ki 3ngut ki rangbah, kiba na Khliehriat, kiba wan Shillong, hynnin ka sngi, kiba hap thiah ha surok bad ka daw, ka long namar ba ki hotel, kim ai jaka sah satia ia ki.
U Ma Starling Rupsi (Dkhar), ha ka jingiakren da ka mobile bad U Rupang, u iathuh ba ki ia don 3ngut para shynrang bad ki la ia wad jaka sah, naduh 9baje haduh 12baje mynmiet, hynrei kim shym ioh satia, ha ki bynta jong ka Khyndailad.
La iathuh da U Bah Starling, ba ki leit shwa ha Ashutosh Inn bad ki la pyn ithuh ialade, ba ki dei na Khliehriat, Jaintia Hills bad mar kumta, ki la pan ia ki kot jingmynjur na ki pulit; hynrei namar ba kim don ia ki kot na ki pulit, ki la shah kyntait ban sah ha katei ka Hotel. La iathuh da U Ma Starling, ba ki la iaid bad leit wad sha 8,9 tylli ki hotel, sawdong jong ka Khyndailad, ba kynthup ia ka Greenland, ka hotel ha MTC bad kumta ter ter, hynrei kitei lei kim kwah shuh tang ban iakren ruh bad ki ai daw, ba ki kamra jongki, ki la dap lut smam.
U Ma Starling, u kren diaw mynsiem, da kaba ong, ba ki briew kiba nabar, ki ioh sahmiet sadhai ha ki jaka sah ha Shillong bad u ong “Mangi pat ki trai shnong, ngim ioh” bad u iathuh ba ki Hotel ki pyrkhing bha ban ai sah ia ki trai shnong, khlem da ioh jingmynjur na ki pulit.
Ha ka kutlad, U Ma Starling, uba dei na ka seng IBSWO, lem bad ki arngut ki paralok U Ma Andrew Nicos Suchiang bad U Ma Shabida Mynthlu, ki la leit kiew noh sha Laitkor bad thiah ha Petrol Pump hapoh ka kali jongki.