Jurip ka RBPM ia ka surok, kaba la iehshrah palat phew snem

Nongpoh, 17 Jymmang:
Da kaba shimkhia ia ka jingujor kaba la ioh na ki paidbah, kiba la pynpaw ia ka jingsngew-khia kaba jur namar ka jingpynsahteng jong ka tnat PWD ban Siangrong ia ka surok kaba tang 1km tam, kata na Mawtari-Lumjyrmi, kaba hap hapoh ka Umsning Constituency, mynta ka sngi ki nongialam ka Ri Bhoi People Movement (RBPM), ia kaba la ialam da u General Secretary, u Bah John Mawphniang lem bad ki dkhot, ki la leit ban jurip ia katei ka surok kaba la sahteng mynta ka palat phew snem.
Kum ban shu pynpaw hangne, katei ka surok kaba la pyniasoh na Umran Niangbyrnai-Quinine, kaba ym duna ia ka 16 km ei ei bad ka dei ruh ka surok kaba la siangrong bad biang na ka bynta ban pyndonkam ha ka leit ka wan, hynrei tang namar ka jiingbym shimkhia ka sorkar ban pyndep ne siangrong ia katei kaba tang 1km, ka pynlong syndon ia katei ka surok ba kan shu sepei, namar ha kitei ki bynta ba dangsah sahteng jong katei ka surok, la lap ba don tang da ki thliew ki syar suda bad kam long na ka bynta ban pyndonkam ha ka leit ka wan, khamtam eh ha ka por lyiur.
Haba kren sha ki Nongthohkhubor, u Bah John Mawphniang, u la ong ba kum ka seng kam lah khlem da pynpaw ia ka jingsngewkhia halor ka jingpynsahteng ka sorkar ia katei ka surok kaba tang khyndiat eh, ha kaba kane hi ka la pynpaw ia ka jingbym shimkhia da ka sorkar ban pyndep na ka bynta ban wanrah ia ka roi ka par sha ki paidbah nongshong shnong ha kane ka thain. U la ong ruh, jin lada ka sorkar kan pyndep ia kane ka surok kaba tang khyndiat, kan da long shisha ka jingkyrkhu kaba khraw sha ki paidbah nongshong shnong ha kane ka thain, namar lyngba jong kane ka surok kan pynsuk ia ki paidbah ha ka leit ka wan, khamtam ia kito ki paidbah na ka thain Mawtari, Nongbah Myndon lem bad kiwei, haba ki thmu ban leit donkam sha Nongpoh.
Kumta, haba iadei bad kane ka surok kaba la pynsahteng mynta la palat phew, ka seng kan leit ban iakynduh ia u EE ka PWD Umsning Division, ban wad jingtip na kaei ka daw kaba la pynlong ia katei ka surok ba kan sahteng kat haduh kine ki sngi, u la bynrap.