Ym shym iarap ia ki shah bat bor ha West K Hills

Nongstoiñ, 15 Jymmang:
Ka seng Hynniewtrep Youth’s Council (HYC) Nongstoiñ Circle hapoh ka jingialam jong u samla Kyrshan Marbaniang Vice President, ha kine ki khyndiat sngi ba la lah kala leit ban iakynduh ia u Secretary ka Meghalaya Legal Aid Service Authority Shillong, ha ryngkat ka jingthoh ban kyrpad na ka bynta ban pyllait noh ia ka Meghalaya Victims Compensation Scheme (MVCS) hapoh jong ka West Khasi Hills District.
Kat kum ka kyrwoh lyngba u tei u nongialam la ong ba ha katei ka jingleit ai jingthoh ia u tei u Secretary, ka seng ka la pynpaw ba haduh mynta mynne hapoh West Khasi Hills ym pat don wat tang iwei ruh i kynthei ba shem lanot kata kiba shah thombor bad bat bor ba kin ioh jingmyntoi lyngba katei ka skhim ba la mang kyrpang da ka sorkar khamtam ia kiba hapoh 18 snem bad kiba duna ha ki dkhot met.
Shuh shuh ha kawei pat ka liang ka seng ka la leit ruh ban ai jingthoh sha ka ophis jong u Chairman ka SLSA, na ka bynta ban kyrpad ban phah buh bad pynbiang noh ia u Plidar Sorkar, hapoh Kashari jong ka West Khasi Hills District, namar ba ka jingbym pat don ia Plidar Sorkar hapoh ka thain ka la wanrah ruh ia shibun ki jingeh khamtam ia ki longkmie kiba la shah iehnoh bein ha la u tnga kiba kwah ban dawa bai bam na ka bynta ki khun.
Ym tang katta, na ka liang jong ka seng ka dawa ruh na ka sorkar ba kan buh noh da ka Special Court bad Fastrack Court hapoh West Khasi Hills District khnang ba ki lanot kin ioh kham kloi ia ka jingbishar kaba hok khamtam ia kiba hap hapoh ka ain Protection of Children from Sexual Offence (POCSO), khnang ba ki runar kiba leh beijot ia ki khyllung khynnah kin shah pynshitom kham kloi, pynkut ka kyrwoh na u samla Kyrshan Marbaniang.