Lah ban iasngewthuh jingmut ka BJP bad NPP

Shillong, 14 Jymmang:
Ka Congress ha kane ka jylla ka lah ban twa syndon khru-ru-khru shwa ban mih ka elekshon MLA 2018 ha kane ka jylla bad katkum ka jingtip, bun ki MLA kynthup ki myntri kane ka sorkar ruh ki la sdang ban lum tiar lum tar noh na ka sem Congress ban mih noh na ka seng ban leit wad iing thymmai.
Ki MLA kynthup ki myntri sorkar ka party ki la iakren bad ki nongialam ka NPP ban leit iasoh noh bad kane ka seng ba ialam da u Conrad K Sangma, namar ba kim pat sngew shngain than ban leit rung ha ka BJP, namar ba kam pat bha dur ha kane ka jylla.
Katkum ka jingtip, kine ki nongialam ka Congress ki la iakren bad ki heh ka BJP kynthup u Dr Biswa Himanta Sarma ba kin don ka jingiasngewthuh jingmut bad ka NPP ha kane ka elekshon.
Ka jingiakren ka long ba ka BJP bad ka NPP ki lah ban iasngewthuh jingmut ha kaba ka BJP kan ailad ia u briew na ka NPP ban shimti ia ka kam myntri rangbah ka jylla lada ka biang ka jingkhein ban ioh ia ka jingbun paid ki MLA.
Ka khubor ba la iohlum, la iathuh ba u nongialam ka NPP u Conrad K Sangma u lah ban nym treh ban shimti ia ka kam myntri rangbah lada jia ba ka NPP kan ioh ban ialam ia ka sorkar hynrei un aiti ha uwei pat uba ki dang iakren iapynbeit mynta.