“Ba bang sur ki nong Pynter, kwah shah hikai ki nong Delhi”

Shillong, 14 Jymmang:
U myntri ka sorkar jylla u bah Prestone Tynsong u la ong ba haba ka kynhun tem na Pynter (Pynursla) ka la leit sha Delhi ban tem sur tynrai ha kawei na ki jingialang, uwei na ki myntri sorkar pdeng uba donlang ha katei ka jingialang u la sngewbang palat ia katei ka sur tem tynrai jong ki bad u la ong ba dei ban hikai lem ia ki briew jong ka nongbah Delhi ruh ba kin tem kumtei. U bah Prestone u la kren kum u kongsan ha ka Convocation kaba 7 jong ka Assembly Board of Music Institute kaba la long ha ka sngi saitjaiñ jong ka taiew ha Dinam Hall, Shillong.
Ha katei ka jingialang la sam ia ki syrnod sha ki 241 ngut ki samla kiba la pyndep ia ka jingshah hikai ha ka rukom tem tynrai na ka Assembly Music Institute jong ka jingïaseng Samla ka KJP Assembly kaba don ha Mission Compound, Shillong.
Kitei ki samla ki dei kiba la shah hikai ban tem duitara, tem ksing, piano, guitar bad tonic solfa. Shuh shuh haba kren kum u kongsan u bah Prestone u la kyntu ia ka Asembly ba kan thaw ki lad ki lynti ban plie lad ïa kiwei de ki jaidbynriew ban wan shah hikai ha kane ka jaka hikai khnang ba ka jingrwai bad tem sur tynrai u Khasi kan nang saphriang bad nangiar ha kylleng ki jaka jong ka pyrthei.
Ha katei ka jingialang ba la pyniaid da u Chairman ka Assembly Board of Music Institute u Bah MAH Syih la donlang u T.Bn EW Kharsohnoh, Director ka Institute, u Rev SR Dkhar, Chairman ka Jingiaseng samla KJPA, u Rev. SS Majaw, Moderator ka KJPA bad kiwei.