La shem taiew yn leit dawa Khasi State ka HSPDP na Delhi

Shillong, 12 Nailar:
Ka kynhun jong ka seng sain pyrthei barim tam na kane ka jylla ka HSPDP kan leit sha Delhi la shem taiew ban aiti ia ka dorkhas jingdawa jylla ha ka ophis jong u Prime Minister (PM) ka ri na ka bynta ban ai jylla noh ia ki Khasi lajong.
U general secretary ka HSPDP u Bah Enbin K Raswai u la ong ba ka kynhun jong ki dkhot ba la phah ka party kin leit aiti ia ka dorkhas ha ka Prime Minister Office (PMO) ha Delhi ha kane ka taiew ban wan ban dawa ban ai jylla ioh ia ka Khasi Jaintia State.
Ka jingdawa jylla Khasi-Jaintia ka dei kaba sahteng jong ka seng bad na ka liang u Bah Enbin u la ong ba ka sorkar pdeng ka dei ban pyrkhat ban ai jylla noh ia ki Khasi bad Garo ha kane ka jylla Meghalaya da kaba pynshong nongrim katkum ka ktien ka thylliej bad ka kolshor kumba la pruid dak ha ka State Reorganization Act, 1956.
U Bah Enbin u la pynieng nia da kaba ong ba lada ia ki Mizo la ai kylla Mizoram, ki Naga ki ioh ia ka Nagaland, bad ka la dei kumjuh ia ka jingdawa ban ioh ia ka Khasi-Jaintia State ia ki Khasi.
U general secretary ka HSPDP u la ong ba kin iakynduh ia u myntri sorkar pdeng ban pynsngew ia kane ka jingdawa jongki ban ai jylla la kajong ia ki Khasi.
“Ka party ka kwah ban shim kabu na ka jinglong jingman namar ba ka la don ka jingdawa na ka bynta ban ioh ia la ka jylla lajong ha ki bynta bapher bapher jong ka ri” la ong u Bah Enbin.