Kiew dor ki marbam ha ka sorkar u Modi

Shillong, 7 Jymmang:
U President ka Meghalaya Pradesh Youth Congress u Richard M Marak u la ther tyngeh ia ka sorkar BJP da kaba kynnoh ba marsien wan ka sorkar BJP ha ka bor ki marbam mardih ki la kiew dor bad katei ka buh jingeh ia ki paidbah, u la ong ruh ba shuwa ban wan ha ka bor u myntri rangbah duh u Narendra Modi u la kular bunjait ki jingkular ia ki paidbah kata ban pynrung pisa ha ka Account jong ki, ban pynioh kam iohjam, ka Sab ka saath sabka Vikash, Achedin hynrei mynta ki kylla lut da khongpong ha kaba ka sorkar ka la lute kylla na u paidbah da kaba pynduh ia ki tyngka rim bad pynmih da ki tyngka thymmai kiba u paidbah u la kyndhu jingeh. Utei u nongialam ki samla ka seng Congress u la ong ba ka seng Congress ka la leh palat ban ia kaba ka la kular ha ki mat elekshon jong ka bad ka ialeh ruh kumno ban wanrah ka jingiatylli ha ka imlang sahlang, “Hynrei ka BJP bad ki paralok seng riewlum jong ka ki pyrshang ban wanrah ka jingiapher bad ka jingpait jingpra ha ki paidbah” u la ong.
Katei ka jingkren u President ka Youth Congress ka dei ka jingialang kaba la long ha ka sngi saitjaiñ ha Nongjri kaba hap ha Mawhati konstitwensi ha kaba la pynskhem ia ki nongkitkam ka Mawhati Assembly Youth Congress kaba u bah Aiborlang Lyngdoh u la bat kum u President , Rapbor Moksha – Vice President bad Gershom Dkhar -General Secretary.Ha katei ka jingialang la donlang ruh u Kyrshan Pamshong, President Shillong Lok Sabha Youth Congress, Rajesh Lapang, President Ribhoi District Youth Congress, Fernandez Dkhar, Secretary Shillong Lok Sabha Youth Congress, D. Daminot Sylliang, President Mawhati Block Congress Committee, Charles Marngar, Secretary Meghalaya Pradesh Congress Committee, Otril Pamshong, Working President Mawhati Block Congress Committee (MDC barim ka Mawhati) bad kiwei pat ki nongialam ka seng Congress. Ha katei ka jingialang u President ka Youth Congress u la kob ruh ba ka seng Congress kan wan biang ha ka bor synshar ha u 2018 ha kane ka jylla