Shillong, 11 Nailar:
U General Secretary ka All India Congress Committee (AICC) ba dei peit ia ka Meghalaya, u Luizinho Faleiro u la kubur ba ka don ka jingiapher jingmut hapdeng ki MLA ka seng, ka don beit tang ba kim iapait. U Faleiro uba wan ha kane ka nongbah, ban iakynduh ia ki MLA bad ki nongtrei ka party, u la ong ba wat la ki MLA ki don ka jing iapher jingmut, hynrei kam don satia ka jingthmu ban pynkhyllem shuki ia u Dr Mukul Sangma kum u Myntri Rangbah ka jylla.
Ka jingiapher jing mut hapdeng ki nongialam bad ki MLA kan iai mih hapoh ka Congress, namar ka dei ka seng, kaba bud ia ka riti synshar paidbah tangba ia kane ka seng, kan pynbeit bad peit ba kam dei ban ktah ia ka bor synshar bad ka roi ka par jongka jylla, u la ong ha ki nongthoh khubor, hynnin ka sngi, hadien ba la wai ka jingialang bad ki nongtrei jong ka seng, kaba la pynlong da utei u nongialam jong ka seng, uba peit ia ka Jylla Meghalaya.
Ki jingbym ia sngewthuh jingmut hapdeng ki MLA Congress kam dei shuh kaba phyla, namar ba ka Congress ka dei ka party kaba ailad laitluid iano iano ban pynpaw ia ka jingsngew jong ki.
Ha kine ki sngi, la mih khubor ba la don ki MLA Congress kiba sdang ban pynpaw pyrthei ba kim mon shuh ba ka party kan dang shaniah ha u Dr. Mukul ban ialam ia ka jylla kum u Myntri Rangbah. Katei ka kynhun ki MLA ka la dep ban ai ksai ruh ba kan aiti noh ha u Myntri Rangbah ba rim ka jylla, u Salseng C Marak ban shimti biang ia katei ka shuki Myntri Rangbah ha kane ka kynti ba mynta.
Wat la u Faleiro um da kren shai, hynrei la iathuh ba ka jingthmu ban pynkhyllem noh ia u Dr. Mukul ka dei kaba la jur bha.
U Faleiro u la wan ha kane ka nongbah ban iasyllok ia ki nongtrei Congress kynthup naduh ki Myntri sorkar, MLA, MDC, ki nongialam jong ki District Congress, Block Congress bad kiwei kiwei ka long ruh ban ia kren sani halor ka jingpyntreikam ia ki 16 tylli ki flagship scheme jong ka sorkar Kmie kumjuh jong ka sorkar jylla.
Ha kane ka jingialang, la iakren ruh halor ka jingpynkhreh na ka bynta ka manifesto jong ka party bad kiwei kiwei kiban pynkhlain ia ka party.
Ha kawei ka liang, u Dr. Mukul Sangma u la iathuh ba ka sorkar Jylla ka kwah ban leh sani bha shwa ban pyntreikam ia ka National Food Ordiance Bill.
“Ngi la ai por 60 sngi ia ka Department ba kan pynbiang ia ka thup kyrteng ki nongioh jingmyntoi bad 10 sngi pat ban pynbeit ia ki jingbakla lada don kiba ujor”, ong u Dr. Mukul haba kren bad ki lad pathai khubor.
Katkum ka jingiathuh jong u, katei ka Food Ordiance kadei kaba la pynkhlain da ka ain ba man la uwei pat uwei nongshogn shnong khamtam na ka longiing ba duna jingioh kin ioh beit 5kilo u khaw ha ka dor 3 tyngka shi kilo.
Phi don ban ong eiei?