Pynlong seminar ka Balang Jowai ban iada Mariang

Jowai, 7 Jymmang:
Na ka bynta ban iada ia ka mei Mariang kaba don jingim ha Sla pyrthei, Ka Balang Presbyterian Jowai ka la pynlong ia ka seminar ha halor ka phang, “Ban Pynneh Pynsah ia ka Mariang” ia kaba la pynlong da ka tnad Socio-Economic Life Development Committee ka Balang Jowai ha kane ka Sngi Saitjain.
Ha kane ka sngi, la wan ia shim bynta da ki Rangbah Balang, ki Tymmen Basan bad da ki Pastor nalor ki paid riewngeit.
U nongkren ba kyrpang ha katei ka Seminar u long u Tymmen Basan PSH Bonnie, IFS uba na ka Balang Kynton Massar.U bah Bonnie haba kren, u la ong ba ka ri kum Khasi Jaintia ka long ka ri kaba la kyrkhu da U Blei. Ka don kynrei ia ki lum ki wah, ki khlaw ki bthap ba itynnad bad ka don ka spah Mariang ba bunjait hynrei namar ka jinglalot spah ia kane ka Mariang ba aiei U Blei la pynjot pynpra.
“Ki lum ba jyrngam, ki khlaw barben, ki um ba shngiam, ki Sim ki doh, bad ki mar pohkyndew, ki la duh bad jan duh lut namar kane ka jinglalot”, la ong u T.Bn Bonnie.
La pynjot ia ki kum ki wah da ki company bapher bapher ban wan dei ia ki mar pohkyndew na kane ka rilum jong ngi”, u la bynrap.
Na ka liang utei u nongsharai Balang, ula kyntu jur ia ki paid riewngeit bad ia ki paidbah ban kyndit bynriew ban iada ia ka mariang namar ba ka Bible ruh ka kren ban iada ia ka Mariang.