Wer ka KAS sha ka ïaid pyneh rngiew ïa ka Ktien Khasi

Shillong, 1 Jymmang:
Ka Khasi Authors’ Society (KAS) kum shi bynta jong ka jingrakhe ïa ka jingdap 175 snem ka jingwanrah ïa ki dak-thoh Khasi, kan pynlong ïa ka jingpynshai paidbah bad ka jingïaid pyneh rngiew ïa ka ktien Khasi ha ka 5tarik Jymmang 2017. Ka jingïalang kan sdang ha ka por 11.30 mynstep, ha ïing Dorbar Shnong Jaïaw Shyiap ha kaba u Pa’iem Phylla Sing Syiem, Syiem Nongstoiñ un long u Kongsan. Kan don “Ka jingïaid pyneh rngiew ïa ka ktien Khasi” shaduh Madan Student, Jaïaw bad ban pynkut ïa ka jingïalang hangto. Ki nongïalam jong ki seng bapher bapher kin wan ban kren halor ka jingdonkam ban kyntiew ïa ka ktien Khasi.
Ka KAS ka wer ïa ki samla samhoi, ki khynnah skul bad kolej, ki longkmie longkpa bad ki paidbah nongshong shnong baroh jong ka nongbah Shillong ban ïasnoh kti lang ha katei “Ka jingïaid pyneh rngiew ïa ka ktien Khasi”.
La kyrpad ïa baroh ki Dorbar Shnong bad ki Seng Bhalang hapoh ka nongbah ban kyntu ïa ki nongshong shnong/ki unit bad ki dkhot jong ki baroh ban ïa mih paidbah ha katei ka sngi. La kyrpad ruh ïa ki Principal jong ki skul ha ki thaiñ Jaïaw bad Mawkhar ban phah ïa baroh ki khynnah Class IX, X bad XII; katba ïa ki Principal jong kiwei pat ki skul hapoh ka nongbah la kyrpad ban phah tang ïa ki khynnah Class XII.
Ka KAS ka wer ïa baroh ban ïa mih paidbah na ka bynta kane ka dawbah ban kyntiew bad ban pynïoh jingithuh ïa ka ktien Khasi.