Da u steel wool lap ka khynnah ha u jingbam lollipop

Nongpoh, 28 Iaiong:
Ka jinglap da kawei khynnah rit ia u Steel Wool na u jingbam khynnah ia kaba la tip kum u Glamy Candy, ka la long kum kawei na ki khubor ka ban pynsaphriang ym tang ia ki para khynnah, hynrei wat ia ki kmie ki kpa ba kin long kiba adkar ia la ki khun ki kti, na kaba pynthied kulmar ia ki jait jingbam ba harukom kiba mih ha kine ki sngi.
Haba pyntip ia katei ka jingjia u Bah Donald Rymbai, uba dei ruh u kpa jong katei ka khynnah rit la ong, ba ia utei u jingbam khynnah la pynthied na kawei ka dukan kaba don ha Byrnihat, hynrei ka long pat kaba lyngngoh ba hadien ba la plied ia utei u jingbam la lap pynban da u Steel Saitiar.
Hadien ba la lap ia utei u Steel Wool, na ka liang utei u Rangbah u la buh ruh ka jing kyrpad sha ki paidbah ba ki dei ban husiar haba ki pynthied jingbam ia la ki khun ba kim dei ban pynthied kulmar ia ki jingbam ha kine ki sngi bad ki dei ban da peit bha hashwa ba kin ai ia la ki khun ki kti.