Shisnem, la pyndep ka jingai jinghikai iakhun eksamin ia ki samla

Shillong, 28 Iaiong:
Ka Sohra Coaching Centre, ka la rakhe ia ka jingdap shisnem pura ka jingsdang ka kam shakri ha ka 30 tarik Nohprah 2016. Ia kane ka jingrakhe la pynlong ha Iingdong Pdengshnong Sohra kaba la sdang ha ka por 10:00 mynstep ha ka jingiadon ryngkat ki member ka Centre, ki khynnah pule katei ka centre,ki rangbah shnong, ki president bad secretary ki Youth Club ka thain Sohra, ki longkmie longkpa bad ki samla.
U kongsan ha katei ka sngi u dei u EAC ka Sohra Sub Division U Bah G.warjri, MCS bad u symbud kongsan, u long U bah A.Mukhim MCS BDO ka Shella Bholaganj Block. U Prof A.K. Nongkynrih, uba long u nongaibuit ka Centre, ula ai ka jingkren pdiang sngewbha ia baroh kiba la iawan ha katei ka jingrakhe.
Ka kong L.M. Synrem, kaba long ka Convener ka Centre, ka la batai shaphang ka jingiaid lynti bad ka jingthmu katei ka centre ha ka jingkren, ka la pynshai ruh ba ka jingthmu jong kane ka Centre ka long ban kyntiew ia ka thain lyngba ka jingsei ia ki samla ki ban iakhun ia ki examination bapher bapher bad khamtam eh ki services examination ha kaba ki khynnah ka thain bad ka jaitbynriew ki dang duna palat kata kum ki IAS, MCS, bad kiwei.
U bah B.Majaw, uba long U Branch Manager ka Meghalaya Rural Bank uba long ruh u dkhot ka centre u la pynshai ba balei ka Sohra ka donkam ia kum kane ka jait centre.
Ha ka jingkren jongu, u la ong ba ka long kaba eh na ka bynta ki khynnah ba kin ioh lut ia ka jingstad kiba donkam ha ka por ba iakhun ia ki eksamin bapher, la ka long ha ka ban ioh rung pule ne ha ka iohkam iohjam lymda ki phai khmat sha kum kine ki jait centre namar ha skul ki nonghikai kin hikai katkum ka syllabus bad kan eh shibun ia ki ruh ban bsut ia ki jingdonkam ki khynnah shabar na ka syllabus.
Kiba la ai jingkren ha katei ka sngi ki long U Bah G.Warjri MCS kum u kongsan, U bah A.Mukhim MCS, baroh kiba la kren ha katei ka sngi ki pynpaw ba ki jait centre kiba kum kine ki long kiba donkam shibun eh ban kyntiew ia ki samla ka thain. Ha katei ka sngi la sam ia ka Khusnam 1st AKN Award sha ki nong jop jong ka “Jingiakob shut Jabieng 2016” ba la pynlong da ka Centre ha ka 02tarik Nohprah 2016 ha ka jingiadon lang ruh ki kmie ki kpa ki khynnah.
Lyngba kane ka kyrwoh ka Sohra Coaching Centre ka wer ia ki khynnah bad samla ka thain sha ka pali kaba ar na ka bynta u snem 2017 ka ban sdang ha ka 16tarik Jymmang 2017 bad ia ki form lah ban ioh na ka dukan U Bah Melchior H Riang (9615674134) kaba ha Iew Sohra.
“To ngin kyntiew ia ka Sohra da ka jingminot, jingstad bad jingshemphang” pynkut ka kyrwoh na ka Secretary Kong F.Kharmaw.