Ka spah snem ba 21, ka jingkut ia ka Congress ha India:BJP

Shillong, 26 Iaiong:
Ka spah snem ba 21 snem ka dei ka juk jong ka jingkut ia ka Indian National Congress (INC) ha ka ri India bad ka jingring mynsiem ba khadduh jongka, kan long ha kane ka elekshon MLA 2018 ha Meghalaya. Ia kane la ong da ka BJP Youth Wing (BJYM) Meghalaya.
Haba pynlait khubor mynta ka sngi, u President ka BJYM Meghalaya u Bah Egenstar Kurkalang u la ong ba ka Congress Meghalaya kan hap thok khana ha ka kot jongka ba u Dr. Mukul Sangma un long u Myntri Rangbah ba khadduh bad ka jingsynshar jongu kan kut noh ha u 2018.
“Ngi sngew synei ia ka Meghalaya Pradesh Youth Congress (MPYC) ba ki dang iai pyneh patho ba ka Congress kan wan biang ha ka bor ha ka elekshon ban wan ha ka jylla Meghalaya watla ki la tip shai ba ka sorkar jylla ka la tyrkhong pisa, ka jingjyllei ki kam bamsap ha man ki tnad sorkar, ki jingthombor ia ki kynthei khynnah kaba nang jur ha ka jylla”, la ong ka BJYM.
Ka la ong ruh ba ka jingdon jong ki khynnah ba pep skul ruh ka la nangkiew, ka jingbym ioh kam ioh jam ki samla, ka jingbym poi ki kam pynroi sha nongkyndong nalor bun kiwei ki kam bymman kane ka sorkar Congress.
Hynrei kaba sngewsih ka long ba ka sorkar jylla ka lapmiet tang ban leh sngewbha da kaba pynlong ia ki tamasa b alai phew jait da kaba pynsyrwa kai ia ka pisa jong u paidbah tang ban ioh leh sngewbha ki myntri sorkar.
Na ki kam kane ka sorkar MUA-II ka Congress, ka kham bha ban khot noh ka sorkar tamasa bad lehkmen, ym shuh ka sorkar synshar na ka bynta ki paidbah, na ka bynta ka roi ka par, la ong u Bah Kurkalang.
Kine ki kam kane ka sorkar, kin sa shah bishar ha ki paidbah ban pyniaid thylli ha ka elekshon 2018 ha Meghalaya bad ka sorkar ba thymmai kaban synshar ia u duk u suk hapoh ka jingialam ka BJP kan sa synshar ha ka jylla, la bynrap u Bah Kurkalang.