Tynruh ka KHNAM ia u CEM ban pynsted ia ka kyndon 128

Shillong, 25 Iaiong:
Ka KHNAM Central Body hapoh ka jingialam u President rangbah jong ka u bah Pyndap Saibon ryngkat u Working President uba dei ruh u MDC ka Jaiaw u bah Adelbert Nongrum ka la leit ban ia kynduh ia u CEM ka KHADC u bah Pynshngaiñ N Syiem ha kamra treikam jong u ban ia kren ba u CEM u dei ban pynsted noh ia ka jingpynbeit thymmai ia ka kyndon 128 jong ka A.D Rules.
Haba kren sha ki nongthohkhubor u bah Adelbert Nongrum u la ong ba ha ka kyndon 128 ki briew ki bym dei ki trai muluk ki trai jaka ki ioh ia ka hok ban jied nongmihkhmat bad wat ban ia khun ruh ha ka elekshon MDC bad ka KHNAM ka kwah ban pyrkhing noh ia ki bar jylla da kaba pynbeit thymmai ia katei ka kyndon. “Kam mut ba ngi isih ia kiwei pat ki jaitbynriew ngi burom ia ki hynrei ngi dei pat ban ieit ialade” ong u bah Adelbert Nongrum.
U bah Adelbert u la ong ba u CEM u la kular ia ka KHNAM ba hapoh ka taiew ba-ar jong u bnai jymmang un s alum ia ki stad aiñ kumjuh ia ki seng saiñpyrthei ban shim ia ka rai bad ka daw ba donkam ban ia donlang ki stad aiñ u la ong ba u CEM u ong ba ka rai kan ieng wat lada ki don ki ban leit sha kiwei pat ki lynti ym ban shu shah rem.
Haba pynkynmaw ba ka KHNAM ka la dawa ban pynbeit thymmai ia katei ka kyndon naduh u 2015 u bah Adelbert u la ong ba ka la don ka por ba u CEM u la kular ban lum ia ki 3 tylli ki ADC ha kane ka jylla ban ia kren lang halor katei ka bynta hynrei ka la don noh ka jingdkoh naba don na ki -ki bym wan ruh. “Nangne shakhmat lada ka dei ia ka KHADC ban iaid marwei ruh hap ban iaid beit shakhmat, u CEM u hap ban pyni ruh sha ki paidbah katno u ieit jaitbynriew” ong u bah Adelbert.