Pynthikna U Mukul ban pynkiew tulop ia ki nonghikai Adhoc

Shillong, 25 Iaiong:
Ki nonghikai All Meghalaya Adhoc Upper Primary School Teachers Association (AMAUP STA) mynta ka sngi, ki la iakynduh ia u Myntri Rangbah ka jylla u Dr Mukul Sangma ban kyntu ban pynsted ia ka jingpynkiew tulop ia ki, kumba u la kular ha iing dorbar mang tyngka dang shen.
Haba kren hadien ba la mih na kamra ba iakren bad u Myntri Rangbah, ki nonghikai ki la iathuh ba ki la ioh ia ka jubab kaba sngew hun halor ka jingpynkiew tulop.
Ki nonghikai AMAUPSTA hapoh ka jingialam u Bah BR Thabah ki la dawa na u Myntri Rangbah ba ka sorkar ka dei ban khein ia ka jingpynkiew tulop naduh u Nailur 2016 kumba leh ia ki adhoc secondary bad higher secondary.
U Bah Thabah u la ong ba ka seng kam kwah ban iamih madan ban iakhih kumba leh kiwei ki kynhun nonghikai namar ba kim kwah ba ki khynnah kin shah ktah hynrei ki kwah ban iaid da ka lynti kaba jai jai.