5 ki MDC duh ka Congress, 2 ngut ka HSPDP namar u bah Pynshngaiñ

Shillong, 24 Iaiong:
Namar ka jingiapyni bor hapdeng u CEM ka KHADC u bah Pynshngaiñ N Syiem bad ka sorkar hapoh ka jingialam u Dr. Mukul Sangma kaba la poi sha u pud ba ka seng Congress ka la hap ban sospon ia u haduh 3 snem kynthih, ka seng Congress ka la duh ei 5 ngut ki MDC ha KHADC bad kitei ki 5 ngut ki la risaiñ wut wut khlem da pynslem na ka seng kaba ki don tang mar ia pynmhi ia ka hukum ba la sospon ia u bah Pynshngaiñ.Kitei ki 5 ngut ki MDC kiba la phet seng na ka seng Congress ki long u bah Antonio War MDC ka Laitumkhrah, u bah Arbinus Lyngdoh MDC ka Umroi, u bah Banteidor Lyngdoh ( Paidang) MDC ka Mawkynrew, u bah Hadrian Lyngdoh MDC ka Mawkyrwat bad u bah Victor Rani MDC ka Jirang. Hadien kane sa ka HSPDP ka la duh ei 2 ngut ki MDC bad kitei ki MDC jong ka kim kohnguh ia ka hukum ka Party jong ki kata ban shong ha ka liang pyrshah hynrei ki la leit ban ai jingkyrshan ia ka PDF hapoh ka jingialam u bah Pynshngaiñ. Ki 2 ngut ki MDC kiba ka HSPDP ka la duh ei mynta ki long u bah L.G Nongsiej MDC ka Nongstoiñ bad u bah Morningstar Mawsor MDC ka Mawshynrut.
Tang katto katne por hadien ka jingjia ia kitei ki 2 tylli ki seng saiñpyrthei ha KHADC mynta pat ka la mih sa ka jingjia ha ka seng UDP ha kaba katei ka seng ka la shim ia ka rai ban weng noh ialade na ka PDF hynrei ki 4 ngut ki MDC jong ka na ki 6 ngut kim shym la kohnguh ia ka hukum ka Party jong ki bad kitei ki ia leh pyrshah ia ka Party lajong da kaba leit ban nang pynskhem shuh shuh ia ka jingkyrshan PDF jong ki da kaba ai syndon da ka shithi sha u CEM bad ki la kdew kti ruh pyrshah ia u nongialam ba kham rangbah jong ki u bah Bindo M Lanong da kaba khyllie ia ki jingjia kiba la jai la kham slem ha KHADC.
Katei ka jingleh ki MDC ka UDP ka la pynlyngngoh ia kiba bun ki nongkyrshan jong katei ka seng bad ka la pynsyier mynsiem ruh ioh ba ka lah pynban ban poi sha u pud kumba la jia ia ka Congress bad HSPDP. Ka Congress ka la duh 5 ngut ki MDC, HSPDP 2 ngut, ka jingkylli kiba mih halor kitei ki jingjia ha KHADC ka long ba hato sa ka UDP kan duh 4 ngut?.