Ka sorkar U Mukul kaba sniew tam ha Dong Mihngi: Himanta

Shillong 21 Iaiong:
U nongialam ka BJP ba peit ia ka Dong Mihngi uba dei ruh u myntri tnad pla tyngka ka sorkar Assam u Himanta Biswa Sarma u la ong ba ka sorkar Congress ha Meghalaya kaba ialam da u Dr Mukul Sangma, ka dei kaba sniew tam haba ianujor ia ki jingtrei bad kiwei ki sorkar ha dong Mihngi bad ha u snem 2018, ka BJP kan thaw ia ka sorkar ha kane ka jylla.
Ha ka jingkren sha ki nongthoh khubor mynta ka sngi hadien ba la kynduh ia ki nongialam bad ki nongtrei ka party ha Shillong, u Himanta ryngkat ka jingdon lang u nongaiktien ka BJP ba peit ia ka Meghalaya u Nalin Kohli, Bah Shibun Lyngdoh u President BJP, u la ong ba shaei kita ki Medical College ka sorkar, ki kolej sorkar, ki skulbah sorkar ha Meghalaya hapoh ka jingsynshar u Dr Mukul Sangma ha kine ki shiphew snem. “Ka sorkar u Dr Mukul Sangma ka dei kaba sniew tam napdeng baroh ki sorkar ha Dong Mihngi”, la ong u Himanta uba dei ruh u convenor ka North East Democratic Alliance (NEDA).
Ha Meghalaya don tang 2 tylli ki kolej sorkar. “Mynta ka Assam ka don 10 tylli ki medical college katba ka Meghalaya ka don tang ar tylli ki kolej sorkar ha baroh kawei ka jylla. Kita ki medical college ki dang sah ha rngai ha Meghalaya. Haei kane ka sorkar u Dr Mukul Sangma ka trei”, la buh jingkylli u Himanta.
Kane ka sorkar Congress kam don satia ka jingsngewkhia ia ka jingeh jong ki paidbah hapoh ka jingsynshar jong u Dr Mukul Sangma bad ki paidbah kin sa ai ia ka jubab ha ka elekshon ban wan.
U la ong ba um iakynduh ia u Dr Mukul naduh u snem 2012 haduh mynta bad um kwah ban iakynduh ia u, hynrei un sa kynduh hadien ba u la rem ia ka elekshon ha kane ka snem ban wan.
“Ka BJP kam don jaka ia u Dr Mukul Sangma bad tang hadien ba u la rem ha ka elekshon ban wan, u lah ban wan sha ka BJP”, u la ong.
U Himanta u la kam ba u Dr Mukul Sangma un rem suk ha kane ka elekshon 2018 ban wan bad ia kane la pynsngew da ki paidbah ka thain Garo Hills.
Ha kajuh ka por, u la ong ba ka BJP ka lah ban pdiang ia ki MLA ka Congress lada ki dei kiba khuid kiba trei bad kiba pdiang ki paidbah bad kan nym pdiang lymmuh ia ki.
U la ong ba ong ba ka BJP kan ujor ia ki kam ka sorkar u Dr Mukul sha ki paidbah ban kyntait shi syndon ia ki kam jongka, bad ban jied ia ka BJP ha ka elekshon 2018 ha kane ka Meghalaya.