Kyntait ia ka seng, kaba set ia ka hok laitluid:Joe Marwein

Shillong, 21 Iaiong:
U bah Joe Marwein, uwei na ki rangbah nong-ialam jong ka seng UDP, ula kynthoh pyrshah ia ka jingpynmih khubor da ka seng BJP Meghalaya Unit, kaba byrngem ban ujor ia ki paidbah, kiba kynthoh pyrshah ia kane ka seng ha ki social media kum ka Facebook, WhatsApp bad kiwei kiwei.
Katei ka long kaei kaei kaba ym lah ban pdiang, ong U bah Marwein, namar ba ka Ri India ka dei ka ri synshar paidbah kaba ai ia ka hok ia baroh ban pynpaw ia la ki jingsngew (freedom of expression) bad ula ong shuh shuh ba ki paidbah ki don ka hok ban kynthoh ia kano kano ka seng katkum ka jingiohi bad jingshem jongki.
“Ka jingbyrngem jong ka BJP Meghalaya Unit ka pynpaw shai ba kane ka seng ka dang lung palat ka bor pyrkhat (immature) bad ka syier ia kito kiba kdew ne kynthoh (criticise) ia ki kam jongka” ong U Bah Marwein. “Ka jingleh jong ka BJP ka la ktah jur ia ka jingsngew uba bun ba lang ha kane ka Jylla bad kumta ka la dei ka kamram jong ki paidbah kane ka Jylla ban kyntait kum ia kane ka seng kaba pyrshang ban set sbak ia ka hok laitluid” pynkut ka kyrwoh U bah Joe Marwein.