“Ngam salia ia ka tiket, dei ka jinglong jong nga kaba pynjop ia nga”

Shillong, 20 ïaiong:
Hadien ba ki 4 ngut ki MDC ka UDP ha KHADC ki la pyni bor da kaba leh pyrshah ia ka rai jong ka CEC ka seng jong ki da kaba leit ban kyrshan ia ka PDF hapoh ka jingialam u bah Pynshngaiñ N Syiem, ki nongthohkhubor ki la twad jingmut na kitei ki MDC aiu kin leh lada jia ba ka Party jong ki kan beh seng ia ki khamtam haba u Senior Working President katei ka seng u bah Bindo M Lanong u la kren shai ha ki lad khubor ba ia kiba pyrshah seng yn beh seng beit.
U bah Arbinus Lyngdoh MDC na Umroi u la ong ba hadien ba u la phet na ka seng Congress u la iohi ia ka jingkren u President rangbah ka UDP u Dr.Donkupar Roy ha ka por ialap elekshon MDC shiteng samoi ba ka UDP kan bteng ban kyrshan ia ka PDF hapoh ka jingialam u bah Pynshngaiñ haduh ban da kut ka samoi treikam bad dei halor katei ka nongrim ba u sngew iahap ia katei ka jingmut ka UDP ba u sa leit ban pyniasoh ialade bad ka seng riewlum kaba heh ha ka jylla -ka UDP. ” Nga la mih na ka seng Congress ban pynneh ia ka EC hapoh ka jingialam u bah Pynshngaiñ, hadien ba nga iohsngew ba kitei ki kyntien ki mih na shyntur u President ka UDP, nga leit ban pyniasoh UDP ialade ha ka 21 tarik u kyllalyngkot mynta u snem” ong u bah Arbinus haba ia kren bad ki nongthohkhubor.
Haba la kylli hato u don jingmut ne-em ban ia khun ha ka elekshon MLA 2018, u bah Arbinus u la ong ba u la pynkhreh bha ban ia khun ha ka elekshon MLA na Umroi. La kylli aiu un leh lada ka Party kan beh seng ia u ne kan pynduh tiket namarba u ia leh pyrshah ia ka rai ka CEC, “Kata te ka shong ha ka Party aiu kan leh, ngam salia ia ka tiket nga duh ne nga ioh bad kam dei ka tiket ka ban pynjop elekshon ia nga hynrei ka dei ka jinglong jong nga ka ban pynjop ia nga hi kaba u paidbah ka Umroi u tip bha ia kata, khlem tiket ruh nga lah ban ia leh elekshon” ong biang u bah Arbinus.
Utei u MDC ka Umroi u la ong ba ka jingaidaw ka UDP halor ka jingweng noh ia ka jingkyrshan na ka PDF ka dei tang ka jingtap eit miaw, “Hynrei ka jingshisha hi dei tang ka jingbishni shimet ia u bah Pynshngaiñ, ha nga nga lap ba u dei u briew uba beit bad uba ia khun ia ki ishu, nga la kren ha ka Sub Committee ba lada don kaei kaei ka bym sngewhun balei ym shu ia kren beit markhmat para ma ngi para doh para snam lajong, jah T.1.52 klur phi ia kren, ba wanrah ia ka T.133 klur pat hato phi ai jingiaroh” ong u bah Arbinus Lyngdoh MDC ka UDP na Umroi konstitwensi.