Byrngem ka ANVC-B ban thang ia ka soskular ia suk bad ka sorkar

Shillong, 20 iaiong:
Ka Achik National Volunteer Council – Breakaway (ANVC-B) ka la byrngem ban thang ia ka soskular ia suk hapdeng jong ka bad ka sorkar namarba haduh mynta ruh ka sorkar kam shym la pyntreikam satia, katei ka seng ka la ai por 5 bnai kata haduh ka 24 tarik u nailur mynta u snem ba ka sorkar ka dei ban pyntreikam noh ia kitei ki jingiasoi soskular lym kumta ka la ong ba kan thang hakhmat ki paidbah, “Ngi la ap bad ngi la iaishah la slem bah bad ngin dang iai shah hynrei ngi la rai ban thang beit lada ym lah pyntreikam hapoh katei ka por ba la buh” ong u Bernard Rimpu N Marak Chairman barim katei ka seng da kaba bynrap ba katei ka jingleh ka sorkar ka dei ka jingthmu ban pyn iapait ia pra hapdeng ki dkhot katei ka seng bad ban pynkynduh jingeh ia ki.
U Bernard u la ong biang “Ki la pynshitom pynjynjar ia ngi bad ngi hap ban mad bun ki jingeh katba ma ki pat ki nang ia sngewbha na ka jingmyntoi kaba ioh na ka jingiasoi da kaba pynieng ia ki maw nongrim jong ki projek bapher bapher”. U Bernard u la kdew ba katto katne ki jprojek kiba la kdew ha ka jingiasi kular ki kynthup ia ka Medical College, Child and Maternity Hospital, ka jingkieng sha shilliang Brahmaputra bad kiwei pat. Utei u nongialam barim ka ANVC-B u la kynthoh ruh ia ka jingthmu ban thaw ia ka State Level Committee ha kaba ym shym la pynrung dkhot ia ki. U la ong ruh ba naduh ba la ia soi ia suk kam pat shym la don kano kano ka jingkhot jingialang da ka sorkar pdeng bad dei hangne ba ka sorkar jylla ka ioh ban nion bein ia ki.
U la ong ba ka thup kyrteng kaba 139 ngut ki dkhot ka ANVC-B ka dei ka bym shym la ioh jingtip da ki nongialam katei ka seng kaba la wan pyndem bad ka sorkar ka shu leh sop sop ia kane, hynrei u la ong ba ki don 210 ngut ki kyrteng bad ia kane ruh katei ka seng ka dang ap jubab na ka sorkar. U Bernard u la kdew bun tylli ki mat naduh ka jingshim jaka kaba khlem siew bai lutksan sha ki paidbah, ka jingai pata bad ka jingai jaka ia ki shipai. Ha kawei pat ka khubor, la ong ba ka tnad MHA kan khot jingialang ha u bnai ban wan ia ki ar tylli ki seng kiba la khylliap lama noh ha ri lum Garo ka ANVC bad ka ANVC-B. U Joint Secretary jong ka tnad kam pohing ba peit ia ka Thain Shatei Lam mihngi u Satyendra Garg u la poi sha kane ka jylla u la shong jingialang bad ki he ophisar ban ia kren kumno ban pyntreikam noh ia katei ka soskular ia suk.