Lap ki 13 seng bym ioh bor u DC na ka sorkar

Shillong, 20 Iaiong:
Ka kynhun ki 13 Sengbhalang mynta ka sngi ki la leit ban ia kynduh ia u Deputy Commissioner ka East Khasi Hills shi bynta kum ka jingsdang ban buddien ia ka jingpyntreikam ia ka Meghalaya Residential Safety Act 2016 bad kumjuh ruh ka District Task Force kaba dei ban peit ia ka jingwan rung ki briew kiba nabar ha kane ka jylla.
Haba kren sha ki nongthohkhubor u President barim ka KSU u ba Daniel Khyriem u la ong ba ha katei ka jingia-kynduh ki la ioh jingtip na u DC ba ym pat lah ban pyntyllun ia katei ka kam namarba ka sorkar kam pat ai bor ia ki DC ban leh, lashai ka sngi u la ong ba kin leit ban ia kynduh ia u DC ka Ri-Bhoi bad Jaintia Hills. U General Secretary ka Hynñiewtrep National Youth Front (HNYF), u Bah Sadon Blah u la pynkynmaw ba ha u snem ba la dep ki sengbhalang ki la ia kynduh ia ka sorkar ba ka dei ban pyndep noh kloi katba lah ia katei ka kam bad la kular ha ki ban leh kumta hynrei haduh mynta khlem leh eiei. Katkum ka jingiakren bad u DC u la ong ba la sngewthuh ba ka Act ka la don hynrei ym pat lah pat ban shna ia ki kyndon kiba dei ban don hapoh jong ka.