Weng ka BJP, ia U bah David kum U Secretery

Shillong, 18 Iaiong:
Ka BJP Meghalaya ka la byrngem ban leit ujor noh sha u Superintendent of Police (SP) ka East Khasi Hills, pyrshah ia ki briew kiba pynher khubor ba ka BJP ka long pyrshah ia ki Khristan bad ka seng shitniam ba la saphred ha ki lad pathai khubor Social media.
Haba kren mynta ka sngi, u President ka BJP u Bah Shibun Lyngdoh bad u Vice President u Bah JA Lyngdoh uba long ruh u nongaitktien ka BJP, ki kyntait ia ka khubor ba ka BJP ka long pyrshah ia ki Khristan bad ki la kam ba ka dei ka khubor tang ban pynthohbria ia ka BJP kaba la kiew stad ha kane ka jylla bad ha kane ka ri.
“Ngin pynkhreh ban ujor noh da ka ejahar ha u SP ka East Khasi Hills pyrshah ia kito kiba pynher khubor hamsaia ruma ba ka BJP ka pyrshah bad thombor ia ki Khristan”, la ong u Bah JA Lyngdoh.
U la ong ba ki jingmih khubor ha ki social media ba la saphred da ki riew shim kabu, ka long beit ban pynthohbria ia ka BJP wat ha ka jingshisha, kam long kumta.
U Bah JA Lyngdoh uba long u chairman jong ka Catholic Association, u la ong, “Ngi kyrpad ia ki paidbah ban ailad ia ka BJP ha kane ka kynti ban wan ha u 2018 ba kan pynshisha”.
Haba kyntait ia ka jingkynnoh pyrshah ia ka BJP ba ka shitniam, u Bah JA Lyngdoh u la ong, “Ka BJP ka ngeit ha ka jinglaitluid jong baroh ki jait niam. Ka jingpyrta ka BJP ka long Sabh ka Sath sabka vikas kaba mut, ka roi ka par ia baroh khlem niew shiliang.
Ha kawei ka liang, u Bah Shibun Lyngdoh u la pynbna ba ka party na khlieh, ka la bate kam thymmai ia ki nongkitkam ka party ha kane ka jylla. Ha kane ka jingbate kam thymmai, ia ka kam President dang bat hi u Bah Shibun Lyngdoh, katba ia ka general secretary kaba bat da u Bah David Kharsati la bujli noh da u Bah Bashai Khongwir bad u Parmod Koch. U Bah David Kharsati la pynkiew kyrdan kum u Vice President lem bad u Edmund K Sangma, nalor u Bah JA Lyngdoh, Smti Sumitra Banerjee, Ernest Mawrie, Rikman G Momin. Ia ka kam Treasurer la ioh da u Sarwan Jhunjhunwala. Ia ka kam president ka BJYM dang bat hi u Bah Egenstar Kurkalang, katba ia ka BJP Mahila la pynskhem ia ka Kong Pelcy Snaitang kum ka President.
Ha kajuh ka por, ki nongialam ka party kynthup u National Secretary u Ram Madhav, u nongpeit ia ka Meghalaya u Nalin Kohli bad u myntri na sorkar Assam u Himan Biswa Sarma kin wan ban ai jingkren ia ki nongkitkam thymmai ka seng ha ka 21 tarik ha ka nongbah bad ban pynkhreh ia ka elekshon ha kane ka jylla.