“Ngim shym tait shnong ne pynduh ia ka hok jong ki”

Jowai, 18 Iaiong:
Ka Bor Shnong Nongbareh Rim jong ka thain Amlarem Sub-Division ka la kyntait war ia ka jingkynnoh ka kynhun hapoh ka jingialam u ma Starlight Talang kaba la mih ruh ha ki katto katne ki lad pathai khubor ba ka don ka jingshah beh bad tait shnong bad ka jingpynduh ruh ia ka hok jong ki 66 tylli ki longing kiba ialeh pyrshah ia ka bor shnong.
“La pharep ia ngi, da katei ka kynhun ba ngi la rai ban pynduh khaw rashon, lum jingtep, lum thangbriew bad kumjuh ruh ban trei bylla 100 sngi tang namar ba ki katto katne ki nongialam katei ka kynhun u ma Talang ka kwah ban kamai spah na ka kam sam Rashon bad kane ka kynrum kynram ka la jia la shisnem mynta” ong ka khubor.
Ka la sdang hadien ba ka la don ka jingbym ioh sam khaw rashon da kawei ka longing kaba kwah ia katei ka kam treimon sngewbha. Hadien ba katei ka longing kam shym la ioh ia katei ka kam sam reshon ka la mih ka kynrum kynram haduh ba kane ka kynrum kynram ka la poi sha ophis jongka Amlarem Sub-Disvision.
Na ka liang ka tnad Supply jong ka Amlarem Sub-Division ka la shim ruh ia ka rai ba baroh 120 iing ki nongioh bynta khaw rashon ki dei ban wan shim beit na ka RM Mukhim, kaba dei ka nongdie lang ha Amlarem.
Kane ka la iaid shisnem bad ki don ruh ki longing ki bym lah ban wan shim hi,hynrei ki la jied ia la u briew jong ki ban leit shim bad ban sam pat ia ki ha shnong.
Halor kane ka kynrum kynram na ka liang ka dorbar Shnong ka la trei shitom ban pynbeit na ka por sha ka por, la ong u Secretary Shnong haba pynshai sha ka kynhun tohkit kiba la hiar mynta ka sngi sha katei ka shnong.
Katei ka kynhun tohkit ka kynthup ia ka Magistor, kong A Kharpuri, u bah Mairom, SDPO, Amlarem bad u BDO ka Amlarem u ma B Sungoh.
Na ka liang kitei ki nongtohkit kin sa phah ia ka kaiphod sha ka SDO, SP bad DC ka West Jaintia Hill.
“Ngi la shimkhia bha ia kane ka jingkynnoh bad ngi la maham ruh ia ka bor shnong lada ka don kum katei ka jingthmu ban tait shnong ia ki nongsong shnong bad lada katei ka jingkynnoh ka long kaba shisha ngin kem ia ki hapoh ki kyndon ain khnang ba kin ioh ia ka jingpynsaja katkum ki kam ba ki leh”, la ong u SDPO ka Amlarem Sub-Division.