Wan ïarap ki Doktor ba tbit, ha Robert Hospital

Shillong, 18 Ïaïong:
Wat lada ka dang don ka jingartatien ha kiba bun ha kaba ïadei bad ka jingsumar jong ka H. Gordon Roberts Hospital, Jaïaw, hynrei ha ka jingwad bniah ki katto katne ki nongthoh khubor, la shem ba da ka jingwan ïatrei bad ïarap lang ki Doktor (Visiting Doctors) ba la kham tbit, kane ka Hospital ka la sdang ban wan biang sha ka jingsumar kumba long ha ki snem baladep.
Katto katne ki Doktor kiba la don mynta ki kynthup ïa u Dr. R. Nongrum, uba bat kum u Medical Superintendent, uba long u Surgeon ne u Doktor puid briew ba tbit naduh ba u dang trei ha Civil Hospital Shillong. Ryngkat une u Doktor u don ruh kiwei pat ki Doktor bat bit ha ka Surgery kum u Dr. K. Khyllep, Dr. P. Lamare, u Dr. I. Nongbri, Dr. I. Syiemlieh, Dr. Lurstep Wanshnong bad kiwei kiwei.
Ha ka liang ka General Medicine u don u Dr. DS Sethi, uba tbit ruh ha ka liang ki jingpang shadem (Cardiologist).
Ki longkmie kiba kwah ban leit kha khunlung ruh kim dei ban don ka jingsheptieng, namar ki don ki Doktor kiba tbit ha kam kha khunlung (Obstetric) kum u Dr. W. Wankhar, Dr. R. Sunn, Dr. K. Ropmay, Dr E. Blah bad kiwei kiwei.
Ha ka liang ka Orthopedic ne ka jingpang kaba ïadei bad ki shyieng, don u Dr. D. Phanbuh, Dr. H. Rapsang bad kiwwei kiwei de ki Doktor.
Ha ka Radiology Department u don u Dr. B.K. Sonowal nangta u don ruh u Neurologist ne u Doktor ba peit ïa ka jingpang ba ktah ïa ka khlieh, uba ju wan ïarap u Dr. AJ Sarmah. Ha ka Pathology bad Microbiology u don u Dr. Nirmal Tudu bad Dr. Raphael Lyngdoh. Ha ka tnad ba peit ïa ka jingsumar ia ki khunlung (Pediatric) I don u Dr. Ibakordorshisha Sun bad lai ngut kiwei pat ki Doktor ba ïarap ïa i. Katba ha ka department jong ka psychiatrist bad counseling u don u Dr. Eddie Mukhim.
Kane ka jingwad jingtip ki nongthoh khubor ka lap ruh ba ka Blood Bank ka treikam bha, ka Dialysis Unit, ka ICU ruh kumjuh. Ka Emegency, ka OT Department ki treikam baroh 24 kynta. Ki kor ki bor kiba treikam ki long ka X-Ray, ka CT Scan.
Wat lada ka Hospital ka don hapdeng ka jingduna pisa, hynrei ki dawai dashin kiba ki paidbah ki kham donkam ki don ka Pharmacy jong ka Hospital, lait noh ki dawai kiba ki briew kim ju kham wad ne ki dawai kiba ki briew kiba ym ju kham ïoh ïa ki jingpang.
La lap ruh ba rukom sumar ka la ïaid bha, ha kaba ki Nurse bad kiwei kiwei de ki nongtrei jong ka Hospital ki ïatreilang bad ki bor pynïaid ka Hospital, wat lada mynta ki dang don hapdeng ka jingeh ïa ka tulop jong ki. La ïohi ruh ba ki paidbah ki la sdang ban wan shah sumar biang ha kane ka Hospital kaba la shakri mynta la kumba 95 snem ha kane ka jylla.