Duh Scholarship ki samla pule, ba kamai sut ka tnat DHTE

Shillong,7 Nailar:
Ka Meghalaya People United Front (MPUF) haba kren sha ki nongthoh khubor mynta ka sngi ki la kynnoh ba ka tnad pule ka la shu ai daw ba ka jingset ia ki baibam jong ki khynnah pule-Post Matric Scholarship ka dei namar ka jingbym biang ki Core Banking ha ki bank. Phewse, ynda la pan jingtip lyngba ka ain wad jingtip paidbah, la lap ba ka jingai daw jong ka tnad pule bym biang ki Core Banking jong ki Bank ka dei tang ban ioh bam ei ia ka sut kaba heh kaba kha na ka bai bam ki khynnah pule. “Ka dei tang ka buit jong ka sorkar ban bam ei ia ka sut ba heh ba kha na ka bai bam jong ki khynnah kaba la sah la slem slem bah ha ki bank bapher bapher.
Ki nongialam jong ka MPUF ki la iathuh ba ha kaba myn nyngkong haba leit ia kynduh ia u Director of Higher and Technical Education halor ka jingpynsah ia ka bai bam ki khynnah, ki la ong ba u Director u la ong ba ym lah ban pyllait ia ka baibam ki khynnah na ka daw ba don ki bank ki bym biang ki Core Banking lait noh ki khynnah kiba don account ha State Bank, hynrei haba ka seng ka la wad jingtip na ki bank bapher bapher ka la shem ba ki don tang lai tylli ki Bank ki bym shym don ka Core Banking, hynrei kiwei pat ki bank ki don lut ia kata.
Hadien ba la sngewthuh ba ki khynah ki la shah shukor ha ka tnad pule ki nongialam jong ka seng ki la wad jingtip lyngba ka ain jingtip paidbah, halor ka scholarship, ha kaba ki la shem ba ki don haduh 61, 706 ngut ki khynnah ba dei ban ioh ia ka Post Matric Scholarship jong ki bad na kitei kumba 8 hajar tam kim pat shym la ioh ia ki scholarship jong ki na ki 88 tylli ki kolej jong ka 1663 kolej ha ka jylla baroh kawei, katkum ka jingkhein jong u 2011-2012 na ka bynta ki Schedule Tribe -Adhoc Grant. Katkum ka jinglap jong ka seng, ka pisa baroh kaba la pyllait na ka bynta ka bai bam ki khynnah pule ka long T.13.59 klur tyngka.