Ka UDP, kam donkam tabain sia lieh bad ki nuti ban leh kam thala

Shillong, 14 Iaiong:
Ka UDP, kam donkam snieh langbrot ne dur bula eiei, kumba long ki nongialam Congress, kiba ri sop sop ia ki khynnah khyllung bad ki nuti ban leh kam thala, ban tabain sia iong sia lieh ia ka hok, ban pynksan ia ka pop, ong ka kyrwoh na U bah Bindo M Lanong Senior Working President jong ka seng,UDP.
Katei ka jingkren jong U bah Bindo, ka long halor ka jingkynnoh jong U Mukul Sangma, ba ka UDP kaba long kum u suri kup snieh langbrot, kan bud ia ki nongrim treikam ka BJP. “Ka sorkar bamsap kaba kit ram ha u niuhmat shi rynnieng bad ka bym salia ruh ban iatrei lang bad ki ksuid ki khrei. Kumno yn iatrei lang shuh kum bat kata ka kynhun? ong shuh U Bah Bindo Lanong bad ula bteng biang “Ki rangbah Congress kim dei ruh ban klet ba haba ka kynhun NCP (mynta NPP) U Purno Sangma ka leit sop-sop sha Delhi ha u snem 2009 ban iatrei lang noh bad ka Congress, dei ki nongialam Congress kiba la wan tied ia ka jingkhang UDP, namar kim kwah ban iatrei lang bad ka kynhun u Purno Sangma”.
Ha kaba iadei bad ka BJP, ka UDP kam dei ruh ka lang matlah ka ban leh thala kum ka Congress bad ka UDP da lei-lei kan ym iatrei lang bad kano-kano ka seng lada ki prokram kata ka seng ki long ban thombor (impose) ia ka riti ka dustur ia ka jingngeit, ia ka ktien ka thylliej, ia ka bam ka dih bad ia kiwei ki hok kiba ka riti synshar jong ka ri India ka iada, ong U bah Bindo. “Ka UDP wat lada kan dei ban ieng marwei, kan ieng ban iada ia ka jaitbynriew bad ki paidbah ka jylla ha baroh kiei-kiei, ban kyntiew ia ka roi ka par ha baroh ki liang bad ban wanrah ia ka suk ka sain, ban ym thut ka shong ka sah bad ka trei ka ktah” pynkut ka kyrwoh khubor.