40 ngut ki MLA, ka thong ka BJP ha ka elekshon 2018

Shillong, 14 Iaiong:
Ka Bharatiya Janata Party (BJP) hynnin ka sngi ka la pynbna ba ka buh thong ban jop 40 ngut ki MLA ha ka elekshon 2018 ha Meghalaya ka ban long lashem snem.
Wat la ka BJP kam don wat tang uwei ruh u MLA mynta ha kane ka jylla, hynrei ka kyrmen ba kan lah ban pynliem ia ka Congress ha ka elekshon ban wan da ka thong jongka ban pynlong ia ka India kaba lait na ka kti ka Congress.
Haba kren sha ki nongthoh khubor hynnin ka sngi, u MP Lok Sabha ka BJP u Laxman Giluwa uba wan jngoh ia ka nongbah uba dei ruh u president ka BJP Jharkhand, u la ong ba ka party ka la buh thong ban jop la kumno kumno 40 ngut ki MLA ha ka elekshon ban wan ha Meghaaya.
“Ngi kwah ban jop la kumno kumno 40 tylli ki konstitwensi ha Meghalaya. Kane ka dei ka thong jong ngi,” la ong u Giluwa.
Hynrei une u nongialam ka BJP um kyntait ia ka jingiatreilang bad ki seng riewlum shwa ne hadien ka elekshon.  U la kyrmen skhem ba ka BJP lem bad ki paralok jongka kin thaw ia ka sorkar khlem artatien ha u 2018.
U la ong ba ki nongtrei ka BJP ki la trei shitom bha ban pynurlong ia ka jingangnud sha kaba shisha ha kane ka jylla Meghalaya.
U Giluwa u la ong ba ia u briew ban shimti ia ka kam Myntri Ranggbah ka jylla yn sa rai hadien ba la dep mih result.
U la ong ba ka thong ba kongsan ka BJP ka long ban pynlong ia ka ri India  kaba lait na ka kti ka Congress. “Ka thong jong ngi ka long ban pynlong ia ka India kaba lait na ka Congress bad ngi la iaid shakhmat halor kane bad ha ki sneme ban wan, ka jingphoh sniew kan kylla urlong”, u la ong.
Shwa ia kane, u president ka BJP u Bah Shibun Lyngdoh  ula pynpaw ba ka seng kan iakhun elekshon marwei, wat la katto katne ki seng riewlum ha ka jylla ki don bynta ha North East Democratic Alliance (NEDA).
Shwa ia kane,  u Giluwaji u la pynshai ba ka jingpynbna ka sorkar India ban rakhe ia ka 14 tarik kum ka Digital Day ha ka ri, ka dei ban kynmaw burom ia ka sngi kha jong u Dr Bhimrao Ramji Ambedkar uba dei u kpa jong ka riti synshar ka ri.
U Giluwaji u la ong ba ka sorkar BJP kam pyrshah ia kano kano ka niam hynrei ka jingrakhe ia kane ka sngi, ka shu jia ryngkhat mynta u snem, ba ka Good Friday ka iatyngkhuh bad ka sngi kha jong u Dr Ambedkar, kaba ka sorkar India ka la rai ban pynlong ia ka  jingrakhe kyrpang kum ka Ditigal Day ha ka ri.
U la ong ba ka thong jong ka sorkar NDA ka long beit ka roi ka par kaba iaryngkat baroh khlem da niew shiliang iano iano ruh. U la ong ba hadien ba la wan ka sorkar BJP ha u snem 2014, ka lyer ka roi ka par ka la pyrsad ha ka ri hapoh ka jingialam u Myntri Rangbahduh ka ri u Narendra Modi.