Shim bynta 1028 ngut ki nongshad kynthei, shynrang ha madan Weiking

Shillong, 10 Iaiong:
Ka Shad Suk Mynsiem kaba 106 jong ka Seng Khasi Mawkhar Shillong kaba lai sngi kynthih ka la kut mynta ka sngi ha madan shad Weiking, Jaiaw kumba ju long man u snem. Mynta u snem, ki don baroh 1028 ngut ki nongshad kynthei bad shynrang kiba la iashim bynta ha kane ka sngi kut jong ka shad. Ki nongshad shynrang ki kham bun kata baroh ki don 547 ngut katba ki nongshad kynthei ki don 481 ngut.
Kumba ju long man u snem, ki nongshad naduh khynnah haduh ki rangbah ki la iashim bynta shitrhem ryngkat ka sur ka tangmuri, ki ksing ki dhah, kum shi bynta ban pyni ia ka riti dustur jong u khun Khasi Khara. La sdang ia kane ka shad ha ka por 1 baje nohphai sngi da kaba sdang naduh ing seng Khasi na Mawkhar shaduh lympung shad Weiking.
Lah ban kdew ba shwa ban pynlong ia kane ka shad, ar taiew shwa la pynlong ia ka jingpyrta da kaba sdang ia ka jingtem bom tem ksing ha ing seng ha Mawkhar kum ka dak ban pynkynmaw ïala ki para kur ki para kha ban pynkhreh naka bynta ban ïashim bynta sha ka Shad Suk Mynsiem.
Ha ka sngi kut jong ka jingshad la wan sakhi lang ruh ki heh Sorkar, kynthup ka Kong Roshan Warjri, u Lat ka jylla, u Banwarilal Purohit, u Chief Justice ka Meghalaya High Court, u Justice Dinesh Maheshwari, ki riew pawkhmat ka jylla, ki President bad Secretary ki tnat ka Seng Khasi bad Seiñ Raij, ki nongïalam ka Seng Khihlang bad kiwei kiwei.
Na ka liang u President ka Seng Khasi (Kmie), u Rangbah Banteilang Rumnong u la batai ïa ka jingmut jong ka jingshad, ïa ki shynrang la pynshad na sharud jong ka jylli namar ba u long u nong ker nong da bad ïa ki kynthei pat la pynshad hapdeng jong ka jylli kaba thew ba kadei ka nong ri nong sumar bad ka nong kdup nong pynbha, wat la ïa ka Ri Khasi la ju kheiñ ka Ri tip briew tip Blei hynrei u la pynpaw ïa ka jing bynñiaw ïa ka jingjur ki kam thom bor pyrshah ïa ki kynthei.
U la ong, “Kum ki Khasi ngi dei ban tip ïa ka burom ka akor bad ban kynmaw ban im tip briew tip Blei khnang ban lait na ka jingsniew jong ka pyrthei ha kane ka juk kaba mynta”, u la ïathuh ruh ba na ka liang ka Seng Khasi ka ju maham tyngeh bad ai jinghikai ïa ki khun ki kti ban lait na ki jingsniew ka pyrthei.