Bym jubab ka sorkar, 12 tarik yn shah thngan ka JACATAM

Shillong, 10 Iaiong:
Ki nonghikai skul hapoh ka lama ka Joint Action Committee of All Teachers Meghalaya (JACATAM), kin pynlong ia ka jingshong shah thngan ha ka 12 tarik Iaiong, 2017 naduh ka por 11 baje mynstep ha khmat ka ophis All India Radio, kaba don hajan ka khyrdop ka iing u Lat ka jylla.
Kane ka jingshah thngan ka long hadien ba ka sorkar jylla kam shym la ai khubor eiei sha ka JACATAM halor ka jingkular jong u Myntri Rangbah u Dr Mukul Sangma ha iing dorbar dang shen ban pynkiew tulop 100 percent ia baroh ki nonghikai Adhoc ha ka jylla jong ki primary bad upper primary skul.
“Namar ba ka sorkar ha ka jingialang ka cabinet kam shym la rai ban pynkiew tulop 100 percent ia ki nonghikai adhoc kumba la kular u Myntri Rangbah u Dr Mukul Sangma ha iing dorbar dangshen, ka JACATAM kam banse ban iaid shakhmat ban pynlong ia ka jingiakhih da kaba shah thngan”, la ong u Publicity Secretary ka JACATAM u Babu Kular Khongjirem.
U Babu Khongjirem u la ong ba baroh ki dkhot jong ka JACATAM kin iashim bynta ha kane ka jingshah thngan.
Lah ban kdew ba ka JACATAM ha ka jingialang ha u bnai ba la dep, ka la rai ban ap haduh ka 11 tarik Iaiong 2017 ia ka jingkular jong u Myntri Rangbah u Dr Mukul Sangma ban pynkiew tulop 100 percent ia baroh ki nonghikai skul adhoc ha ka jylla kumba u la kular ha ka iing dorbar dang shen.