Kyrdem ki hati ia ki maw nongrim U Dr.Khonglam bad U Sayeedullah

Shillong,9 Iaiong:
Haba la jubor ka kular bang thylliej, ki mrad ruh ki bitar bad katei ka la jia ha Jirang Kon stitwensi ha kaba la 15 snem mynta ki paidbah ki la ap khmih lynti lano kin ioh PHC, hynrei ka long lehnohei naba la shu pynbiej kai ia ki tang da ki maw nongrim elekshon.
Ha kane ka sien, ka la jia ka jingjia kaba kham phylla kaba la jia ha katei ka konstitwensi ha kaba hati khlaw ruh ki nang ban bitar ia katei ka jingshah thok shah shukor ki paidbah bad la iathuh ba mynta ka sngi ka kynhun ki hati khlaw ki la leit ban kyrdem ia kitei ki mawnongrim haduh ba ki la pra hi phum.
La wan thung maw nongrim la arsien ha Jirang konstitwensi ban tei PHC bad la thung ha u snem 2002 bad 2003 ha ka jaka ba la tip kum ka Sohkshang, New Jirang-Ri-Bhoi District. Ha u snem 2002 la thung da u Dr.F.A Khonglam (Bam kwai ha dwar u blei) uba dei u myntri rangbah ka jylla ha katei ka por, hadien katei sa ha u snem 2003 la wan thung da u Sayeedullah Nongrum u myntri ka koit ka khiah ha katei ka por hynrei ia kitei ki maw nongrim la shu sop soh pailen bad ym pat iohi syrngiew PHC haduh mynta ruh.