14-16 tarik ka lympung Seng Khihlang ha Pynursla

Shillong, 09 Iaiong:
Ka lympung ba laiphew (30) jong ka Seng Khihlang kan long mynta u snem ha madan Urksew, Pynursla, East Khasi Hills naduh ka 14 haduh 16 tarik Iaiong 2017.
Ha kane ka lympung, yn wanrah ia ki mawbynna sahnam da ka Sein Raij Muthlong, West Jaintia Hills ryngkat ka Nguh ka Dem Blei bad ka suit ka shor. Ha kine ki lai sngi kynthih, kan don ruh ka jingiatainia, ka jing iakop rwai, ka phawar, ka jingkren da ki riew kynsai ka Seng Khasi Sein Raij bad ka jingpyni riti dustur na ki tnat seng bapher bapher ka bri u hynniew trep ban pynphalang ia ka jingshai jong ka jaitbynriew. Halor kane, ka Seng Khihlang, ka khot ka wer ia ki khun ki ksiew u hynniewtrep ban iapoi khnang sha kane ka lympung ba kyrpang, la ong ka kyrwoh na u Secretary ka Seng Khihlang.