Wan iashim bynta U Conrad ha ka Shad Rongkusi ka Shnong Nongbareh

Amlarem, 9 Iaiong:
Ka Shnong Nong bareh Lyntiar kaba hap hapoh Amlarem Sub-Division ka la pynlong biang mynta ia ka Shad Rong kusi jong ka mynta ka snem ia kaba la wan shim bynta lang ia kane ka jingshad da u MP ka Tura u Conrad K Sangma kum u Kongsan ha ryngkat ka jingdonlang u MLA ka tei ka Thain u Ma Stephenson Mukhim kum u synbud kongsan, u MDC ka War Central u Ma Holando Lamin, ka SDO Amlarem I Kong Isawanda Laloo, I EAC Amlarem I Kong JU Kharpuri, I Ma H.Mohrmen bad shibun ki paidbah kiba la wan sakhi lang.
Ha kane ka sngi wan plie u Conrad ia ka ia kane ka jingshad Rongkusi u la plie artad ruh ia u mawnongrim jong ka skul na kane ka Shnong ka Nongbareh Lyntiar Secondary school ha kaba kane ka skul kaba don jingthmu na ka bynta Ban tei thymmai ia kane iing skul.
Ha shwa ba u kongsan un ai jing kren  u Headmaster jong kane ka skul u Prolin Langshiang u la ai ia ka dorkas ha kaba iadei bad ki jing donkam jong kane ka skul ha u Conrad K Sangma.
Ha ka jing kren jong u Conrad kum u kongsan u la pynpaw  da ka jingkmen ia ka jinglang biang jong u bad ki nongshong shnong jong kane ka Shnong hadien ba u la ju wan teng ia kane ka Shnong naduh u snem 2008, u la  ai ka jing kyntu  ia ki nongshong shnong jong kane ka Shnong ba kin nang pynkiew shuh shuh  ha kaba iadei bad ka jingnang jingstad lyngba ka pule ka dangle, da kaba u la ong ba na ka liang jong u kum u MP un pyrshang ban ai ka jingiarap ia kane ka skul kumba 10 lak tyngka ha kane ka snem Ban wan .
Ha kane ka sngi na ka liang jong u MLA jong kane ka Thain u Stephenson Mukhim u la ai ia ka jingiarap ha kaba iadei bad ki riam Shad Rongkusi jong kane ka Shnong kaba la kot sha ka 75,000 tyngka .