Ha u Naiwieng ne Nohprah, yn pynlong ia ka elekshon MLA?

Shillong, 6 ïaiong:
Bun ki jingiakren ki la mih ha kine ki sngi ba ka elekshon MLA ka lah ban long ha u naiwieng ne nohprah mynta u snem. U Rupang u la wad jingtip ia kane, hynrei ym shym la ioh ka jingtip kaba long thikna, hynrei ki tnad syntiat ki la iathuh ba ka Election Commission ka la shong jingialang mynhynin ka sngi ban pyrkhat ban pynlong kloi noh ia ka elekshon ha kane ka jylla bad kiwei pat ki jylla kum ka Tripura bad kiwei. Katkum ki lad khubor la iathuh ba ka Election Commission kam pat lah ban shim rai mynhynnin ka sngi bad la ong ba mynta ka sngi ruh ka la shong jingialang biang bad la iathuh ba ka rai ka lah ban mih noh shen ha kane ka taiew ban wan.
Kiwei pat ki lad khubor ki la iathuh ba ka sorkar pdeng ruh kaba lamkhmat da ka seng BJP ka kwah bha ban pynlong kham kloi noh ia ka elekshon ha kane ka jylla naba ka lyer ka BJP mynta ka dang suhsieng bha khamtam hadien ba ka la ioh jingjop dang shen ha Uttar Pradesh, Manipur, Goa bad ymda kham slem than ha Assam.
Ha kawei pat ka khubor, u Rupang u la twad jingmut na ki katto katne ngut ki MDC kumno ki sngew lada jia ba ka elekshon kan long noh ha u naiwieng ne nohprah kumba la her ki khubor hamsaia-kiba bun ki MDC ki pynpaw ba ki kmen palat lada jia ba yn pynlong kloi noh ia ka elekshon naba mynta ki dang ia shongshit bha ban sam skhim paidbah na ka T.3 klur tyngka kaba ki ia sam para ma ki ba ki ia ioh lyngba ka Special Assistance na ka sorkar pdeng kaba haduh T.133 klur tyngka.