Tang hapoh shibnai, sniew ka surok Jowai Bypass ba 46 klur

Jowai, 6 Iaiong:
Ka Surok Jowai Bypass kaba jrong kumba 8 km naduh Pung Thadlaskein haduh Soomer, ka la jot la pra noh tang hapoh shibnai eiei naduh ba la dep ban plie lane shah iaid kali.
Khublei ia u Slap ba la ther ha kine ki khyndiat sngi ba sa paw katei ka jingtrei torti ia katei ka surok da ka Ms. Dhar Construction Company lyngba ka PWD Central Division, Jowai ha ka jinglut kaba haduh 46.6 klur tyngka.
U Executive Engineer ka PWD, u ma Sainia Kyndiah u la iathuh ba ia katei ka surok la trei lyngba ka skim sorkar kmie kaba la tip kum ka Special Accelerated Road Development Programme for North Eastern Region (SARDP-NE), Ministry of Road Transport and Highway.
“U slap u la iarap shisha ia ngi ban iohi ia katei ka rukom trei torti”, u la ong bad ha kajuh ka por u la ong ruh ba katei ka Company kan hap ban kitkhlieh ban maramot ia katei ka surok na ka jinglut na lade”.
“Kane ka dei katkum ka National Highway Standard ha kaba kano kano ka Company kaba pyntrei ia kano kano ka surok ka hap ban peit haduh 3 lane 4 snem ban maramot hi na pla la jong lada ka surok ka sniew noh.
Ia katei ka surok la dep ban trei ha u Nohprah 2016 bad la plie ia ka ha ka 22 tarik u Rymphang 2017.