Da ka Mawshynrut, ym ka Sonapahar, ong ka KSU ha U DC

Nongstoiñ, 6 Iaiong:
Ka seng Khasi Student Union Mawshynrut Circle, hapoh ka jingialam jong u samla Armstrong Sohshang ha kine ki khyndiat sngi ba la lah kala leit ban ia kynduh ia u Deputy Commissioner ka West Khasi Hills District u Arun Kumar Kembhavi, ha ryngkat ka jingthoh ban dawa pyndam noh ia ka kyntien Sonapahar kaba la ju pyndonkam ban thoh ha ki ophis sorkar bapher bapher kiba don hapoh Mawshynrut Block.
Haba iakren bad u nongthoh khubor ha kaba iadei bad katei ka bynta na ka liang jong u samla Armstrong Sohshang u la ong ba ka jingpyrshah jong ka seng ia katei ka kyntien ‘ Sonapahar’ ka long namar ba katei ka kyntien kam dei ka kyntien Khasi ha kaba kiba bun ki nong shong shnong jong ka thain kim sngewtynnad ban jer ne khot da katei ka kyrteng iaka ka thain, bad haka jaka jong katei ka kyntien dei ban pyndonkam bad thoh noh da ka kyntien Mawshynrut ha man la ki ophis sorkar kaba dei ka kyntien ka ba iahap bad kit jingmut ia ka thain hi baroh kawei.
Halor ka jingioh jong ka Mawshynrut ia katei ka kyntien Sonapahar na ka liang jong u bah Sohshang u la ong ba kadaw ka long namar ba kham mynshwa ha katei ka thain la don kawei ka kompani kaba la wan ban surbe ia ki jaka puta, namar ba katei ka thain kala paw nam bha ha ka jingdon ia ki marpoh khyndew barem dor bad namar ba ki nong trei katei ka kompani kim dei ki Jaitbynriew Khasi kumta kila jer bad pynmih ruh ia katei ka kyntein Sonapahar ha ka jaka jong ka Mawshynrut, ha kaba jan baroh ki ophisar sorkar haduh mynta ki dang iai pyndonkam ia katei ka kyntien nongwei.
Shuh shuh u bah Sohshang u la ong ruh ba ha kaba iadei bad katei ka bynta na ka liang jong u DC u la kular ba un sa shimkhia bad ban pyndep ia katei ka kam hapoh 6 bnai, hynrei na ka liang jong ka seng kala ai jingmut bad kyrpad ia u DC ba un kham pynkloi ia katei ka kam la kumno kumno ban pyndep noh hapoh shi bnai namar ba ioh lehse ka sorkar kan plie noh ia ka Civil Sub Division.
“Ha shwa ba ka sorkar kan sa plie noh ia ka Mawshynrut Civil Sub Division, baroh ki ophis sorkar kiba don ha ka thain kidei ban thoh noh ia ki address jong ki bad ia ki signboard da ka kyntien Mawshynrut bad nangne shakhmat lada ka seng ka dang iohi biang da ka kyntien ‘Sonapahar’ ha ki signboard jong ki tnad sorkar bapher bapher ka seng kan sa leh iaka ba donkam” pynkut u bah Sohshang.