“Ka Sohiong, Chokpot, Ranikor kam don ha ka mang tyngka”

Shillong, 5 Iaiong:
Kham mynshuwa ka sorkar ka la pynbna ba kan plie noh ia Mawshynrut Civil Sub-Division bad ka Mawlai C&RD Block ha u iaiong mynta u snem, u MLA ka HSPDP na Mawshynrut konstitwensi u bah Witting Mawsor u la ong ba u la ia kren bad ka sorkar hynrei ka la ong ba kam pat buh tarik “Nga dang shu phone ia u Dr.Mukul u ong ba um pat buh tarik” ong u bah Witting.
Shuh shuh u la ong ba ki paidbah katei ka thaiñ ki la angnud ban plie noh ia ka Civil Sub-Division, hynrei ka jingpynslem ka sorkar ka la pynartatien pynban ia u. U la ong ba kiwei pat ki jaka ki bym don kyrteng ha ka jingkren mang tyngka jong u myntri rangbah kum ka Ranikor Administrative Unit, ka Sohiong C&RD Block, ka Chokpot la plie la ka plie kumto katba ka Mawshynrut bad ka Mawlai pat kaba la don hapoh ka thup kyrteng ym pat shym la pyndep haduh mynta ruh kaba la dap shisnem.
“Nga i artatien pynban ba ka Ranikor, ka Chokpot , ka Sohiong ka bym don kyrteng ha ka jingkren mang tyngka (Budget Speech) hynrei la leh la ka leh, hynrei ma ngi pat ki ba la don kyrteng ym pat shym la leh haduh mynta ruh. Baroh la pyndep lut sa tang ka jong nga bad ka jong u bah Embhah” ong u bah Witting uba la kdew ba ha konstitwensi jong u ki don ar tylli ki ba ka sorkar ka la pynbna ban plie kata ka Mawshynrut Civil Sub-Division bad ka Riangdo Police Station hynrei kawei ruh ym pat pyndep satia.
Ha kawei pat ka khubor u la iathuh ba mynta u don hapoh konstitwensi ban leit sha ki shnong bapher bapher ban ai jingiarap da ki tin soping namar ka jingshah pynjulor kiba bun tylli ki ing ha ka jinghap phria ha kine ki ar sngi. U la iathuh ba ki don da ki spah tylli ki ing ha ki shnong bapher bapher hapoh Mawshynrut konstitwensi, “Ka jinghap phria kaba jur bha, ka jingrben u phria ha madan ka long haduh shi pruh, ngam pat ioh jingtip ban don kano kano ka jingmynsaw hynrei ka rep ka riang ka la julor bha -bun ki riew hadem kiwei pat ki jingthung ki dang shu thylleng ban mih soh hynrei ki la julor lut, ngim pat ioh ban shim jingkhein lut katno ka jingjulor” u la ong.