Dawa jurip eriong ka BJYM na u CS

Shillong, 05 Iaiong:
Ka BJYM Megha-laya ka la dawa na u Chief Secretary ka jylla u KS Kropha ba ka sorkar ka dei ban thaw ia ka kynhun jurip eriong na ka bynta ban pynthikna ba ki briew kiba iakynduh ia kane ka jingeh kin ioh ia ka jingiarap khlem shah ieh ha ka sorkar.
Ha ka jingthoh ba la phah sha u Kropha mynta ka sngi, u President ka BJYM u Bah Egenstar Kurkalang u la ong ba ka sorkar ka dei ban thaw ia ka kynhun, khnang ban pynsted ia ka jingshim jingdiah ia ka jingjulor jong ki mar rep, ki iing ki sem jong ki briew. Ym katta, ka sorkar ka dei ban pynsted ruh ia ka jingai jingiarap katkum ka jinglut jingsep jongki, ym ban shu ai baishun.
“Na ka bynta ban pynsted ia ka kam, ka sorkar ka dei ban thaw da ka kynhun jurip halor ka jingjia eriong ha ka jylla ha kine ki sngi”, la ong u Bah Kuralang.