Shillong, 5 Iaiong:
Hadien ba la kut ka jingbuh por ia ka sorkar ka Synjuk jong ki nonghikai SSA bad 4th teachers hapoh la jylla, ka Meghalaya SSA School Association (MSSASA) Central Body ka la pynbna ia ka ra ia khih da kaba iaid paidbah ha nongbah Shillong ha ka 12 tarik mynta u bnai naduh ka por 10 baje mynstep. Katei ka jingiaid paidbah kan sdang naduh Jingkieng -Nongthym mai bad kan iaid lyngba ka Fire Brigade, St.Edmund’s College, Dhankheti, Malki, Barik, IGP bad yn pynkut ha Addl Secretariat, ong u Aristotle C rymbai President ka MSSASA.
Ia katei ka rai ka kyrwoh khubor ka la ong ba la shim namar ka jingbym sngap ka sorkar ia ka jingdawa bad ka por ba la buh ka la kut noh ha ka 31 tarik u lber. Katto katne ki mat jingdawa ki long ka tulop thymmai bad Arrears jong ki 12481 ngut ki nonghikai SSA kaba ki dei ban ioh naduh u April 2016 katkum ka jingpynmih hukum da u Commissioner bad Secretary ka tnat pule puthi ka jylla uba long ruh u State Mission Director ka SEMAM , ka tulop ki 4th teachers kiba don 1521 ngut hapoh ka jylla kaba la shu sah teng naduh u snem 2013 bad ban pynbeit ia ki kynrum kynram jong ka resol Diploma in Elementary Education (D.El.Ed) kaba la shu sah teng mynta la shi snem tam.
Lah ban kdew ba kham mynshuwa ki la byrngem ban ialam bad khun bad kti bad bahaing hasem ha ka jingiaid paidbah kaba kin sa pynbna.
Phi don ban ong eiei?