Ka jing ia phylliew jingmut ki khynnah skul ha Jowai

Jowai, 5 Iaiong:
Wat hadpeng ka jingsniew ka suin bneng, ki 120 ngut khynnah skul na kylleng ki la wan ban ia shim bynta shongshit ha ka tamasa Jamboree kaba nyngkong eh ha Jaintia Hills kaba la pynlong da ka District Arts and Culture Society ha ryngkat ka bor synshar District ha North-east Adventist College, Khliehtyrshi kaba la sdang mynta ka sngi bad kaban kut ha ka 7 tarik une u bnai.
Ka mat pdeng kane ka Jamboree ka dei ‘Igniting the Young Minds’ ha kaba u Deputy Commissioner, R Rapthap u la plie donburom ia ka, mynta ka sngi.
U bah Rapthap u la ai khublei ia ki ophisar, hapoh ka jingialam u ADM bah DM Wallang halor ka jinglah jong ki ban pynlong ia kane ka program.
“Kane kadei ka sien kaba nyngkong eh ban pynlong ia kum kane ka tamasa na ka bynta ban iarap bad ban pynioh ia ka lad ia ki khynnah skul ban wan sha khmat ban ioh ia phylliew jingmut hapdeng ki para khynnah skul kiba na kiwei pat ki skul bad ban pyni ruh ia la ki sap ki phong kiba ki don.
U la kyntu ia ki khynnah skul ban shim ia kane ka kabu kaba don ban tip ia kiwei bad ia lade da kaba ia shim bynta shongshit ha kum kane ka program.U la kyntu ruh ia ki ba kin long kiba kohnguh bad tip ha kine ki 3 sngi.
Katba na ka liang ka kong B. Blah, kaba dei ka Block Development Officer, Thadlaskein C& RD Block cum programme co-ordinator ka la iathuh ba ha kine ki lai sngi kan don ka jingkren sha ki khynnah skul da ki riew paw khmat kiba kynthup ia u Dr. S. Syiem, Brain Dali Kharphran bad Dr. S. Pohsnem.
Kan don ruh ka jingiaid kjat (trekking) sha ki jaka donnam naduh Khimusniang shaduh Krangshuri, kaba dei ka jaka shut wait ki shipai u Syiem Jaintia. Krang ka mut Krem, Shuri kamut Waitlam ha ka ktien War Jaintia. Na ka liang ka kong I. Laloo.IAS, SDO Amlarem Civil Sub Division ka la ong ba ka jingthmu ba kongsan eh jong kane ka Jamboree ka long ban ai lad ia ki khynnah skul ia ka rynsan ban ioh ia ka lad ban ia khynnduh ia kiwei pat ki para khynnah skul bad ban ioh jinghikai mar kylliang.
Ia ki ktien ai khublei la ioh na u bah B. J Kharshandi, EAC ka West Jaintia Hills District.