7 tarik yn tur ki nongot doh masi sha Secretariat

Shillong, 04 Iaiong:
Ka Khasi Jaintia Butchers Welfare Association (KJBWA) ka la rai ban pynlong ia ka jingiaid paidbah ba jar jar ha ka 7 tarik Iaiong ha nongbah Shillong ban pynpaw pyrshah ia ka jingshalan tuh ia ki masi sha Bangladesh.
Ha ka jingpynlait khubor mynta ka sngi, u bah Theodore Nongsteng u general secretary ka KJBWA u la ong ba ka jingialang kaba long mynta ka sngi, kaba la wan iashim bynta da ki spah ngut ki dkhot, ka la shim ia ka rai ban pynlong ia ka jingiaid paidbah kaba jar jar ha ka por 1 baje nohphai sngi na Motphran sha Additional Secretariat ban pynpaw pyrshah ia ka jingshalan masi tuh ne beain sha Bangladesh.
U la ong ba ka jingshalan tuh ne beain ia ki masi sha Bangladesh ka la ktah jur ia ki nongot doh masi bad kumjuh ia ki nongbam doh masi na ka jingkiew ka dor ka doh masi.
Halor kane, ka seng ka la khot lang ia baroh ki paidbah kiba don mynsiem ba kin wan iashim bynta lang ha kane ka jingiaid paidbah ban pynsngew sha ka sorkar, la ong u Bah Nongsteng.
La kyntu ruh ia ki dkhot ka seng ba kin iapoi ryntih shuwa ka por 1 baje khnang ban sdang ia ka jingiaid paidbah ha ka por kaba biang.
Ha kawei ka liang, ka ai jingiaroh ia u MLA ka Nongkrem u Bah Ardent M Basaiawmoit uba la rah ban iakren ia kane ka jingeh ki nongkhaii masi na ka jingshalan beain sha Bangladesh.