Haduh mynta nga dei u Congress, ka politik ka lah ban kylla: Rapsang

Shillong, 4 Iaiong:
Mynta ka sngi kum-ba 40 ngut ki nongialam ba hakhmat ka seng UDP na west Shillong konsti-twensi ki la leit ban pyniasoh ialade sha ka seng Congress ban ai ka jingkyrshan radbah ia u bah Mohendro Rapsang ha ka elekshon MLA 2018. Kitei ki nongialam jong ka UDP ki kynthup na ki Unit bapher bapher kum na Lumdiengjri, Qualapatty, Lama Villa,Mawprem bad kiwei pat ki Unit.
Ka kong Bari Thangkhiew General Secretary ka UDP na Lama Villa Unit kaba dei ruh ha kajuh ka por ka Secretary jong ka Constituency Committee Women’s Wing jong ka West Shillong bad u bah Willyson Iongnong Vice President ka UDP na Lumdiengjri Unit ki la ong ba kiba wan mynta ka sngi ban kren sha ki nongthohkhubor dei tang ki nongialam hynrei ki don pat da ki spah ngut ki paidbah kiba bun kiba bud lang ia ki nongialam.
La kylli na ki na kaei ka daw ba ki la phet na ka UDP ban leit ia soh Congress, ki la jubab ba ka daw ka dei namarba ki la kwah ban wanrah noh ia ka jingkylla. Ki la ong biang ba haba ki ong ka jingkylla kam shym dei eh ia ka roi ka par hynrei ki kwah ban wanrah da u bah Rapsang kum u nongmihkhmat katei ka konstitwensi da kaba ong ba u dei u briew uba la iarap shibun ia ki longing longsem kiba duk ba kyrduh ha ka jingiakynduh kam shimet jong ki. Ki la iathuh ruh ba ka daw ba ki phet noh na ka UDP hapoh ka jingialam u bah Paul Lyngdoh MLA ba mynta ka dei namarba kim sngewhun ia ka jingiakynduh kam jong ki bad u bah Paul.
U bah Mohendro Rapsang uba donlang ha katei ka sngi haba kren sha ki nongthohkhubor ha ing jong u kaba don mar pyrshah ka ophis u SP East Khasi Hills u la ong ba da ki spah ngut ki dur khmat thymmai ki la wan ban ia soh bad u bad ban kyrshan ia u ha ka elekshon MLA 2018. U la ong ba kiba bun na kitei ki spah ngut ki dei ki nongkyrshan jong ka UDP bad mynta u la ong ba u don ka jingkyrmen kaba skhem ba un jop ha ka elekshon 2018. U la pynkynmaw ba ha u 2013 ha ka sien ba nyngkong eh ba u aireng pyrshah ia u bah Paul u la shah rem tang da 481 vote, “Mynta ka kynti nga don ka jingkyrmen ba ngan jop khamtam hadien ka jingwan ia soh thymmai ki spah ngut” u la ong.
La kylli na u bah Rapsang hato u la kut jingmut lane u la sngew thikna ialade ban ia khun na ka seng Congress ha u 2018, “Haduh mynta nga dei u Congress, hynre iym lah ban tip ka politik te ka politik ka lah ban kylla ha kano kano ka por ruh” u la jubab. La kylli biang hato haba ki spah ngut ki wan pyniasoh sha u don pat ne-em kiba phet na u, “Ki don 4 ngut kiba la phet noh” u la jubab biang. Katkum ka jingiathuh u bah Rapsang uba la long teng u myntri pla tyngka ka Hima Mylliem u la ong ba haduh mynta ki kyrtong kiba dang iaid shakhmat na bynta ka 2018 dei tang ma u bad u bah Paul.