Ang lyngngoh ki KHNAM bym poi u MDC ka Mawkhar

Shillong, 4 Iaiong:
Jan baroh na ki nongialam ba hakhmat ka seng KHNAM ki la poi mynta ka sngi ha jingra-khe 15 snem katei ka seng kaba la ia kynduh lang ha ingsah u bah Adelbert Nongrum (Working President) kaba don ha Jaiaw. Hynrei ym shym la iohi ia u MDC ka Mawkhar-Pynthor u bah James Ban Basaiawmoit ba un donlang ha katei ka jingialum ki nongialam KHNAM.
La kylli na u bah Adelbert hato ka KHNAM ka la phah jingtip ne-em sha u bah James Ban ba ka don katei ka jingiarakhe 15 snem, u bah Adelbert u la ong ba la pyntip. La kylli biang hato u bah James Ban u la pyntip ne-em ba um lah ban poi ne ioh ka don kano kano ka daw kaba um lah kiar ban poi sha katei ka jingialang, “Em, ngi khlem ioh jingtip eiei-u khlem pyntip” ong u bah Adelbert. Katei ka jingbym lah u MDC ka KHNAM na Mawkhar ban poi sha katei ka rakhe 15 snem ka la pynlyngngoh ia kiba bun ki nongialam jong ka KHNAM.
Ha kawei pat ka khubor, ki lad khubor ki la iathuh ba u bah James Ban Basaiawmoit u la pynkhreh bha ialade ban ia khun ha ka elekshon MLA 2018 na Pynthor hynrei haba wad jingtip na ki nongialam KHNAM la sngewthuh ba kam pat don kano kano ka jingiasyllok ne ka jingpynsngew sha ka Party ba u don jingmut ban ia khun elekshon MLA. Hynrei kiwei pat ki lad khubor ki la iathuh ba u bah James Ban u lah ban ia khun na ka PDF ka seng saiñpyrthei kaba dang shu mih thymmai.