Lum jingialang U DC ia ki shipai bad ka Lawsohtun

Shillong, 31 Lber:
U Deputy Commissioner ka East Khasi Hills u bah P.S Dkhar mynta ka sngi ki la lum ia ka jingialang hapdeng ki bor shnong ka Lawsohtun, ki bor District, bor shipai, ia ka kynhun ki nongialam shnong la ialam da u bah Sanbor Shullai MLA ka 19th Shillong South konstitwensi ryngkat u bah Ricky Shullai MDC ka Laban-Mawprem ha ryngkat ka jingdonlang u Rangbah Shnong u bah M Wankhar. Ha katei ka jingialang la shim ia ka rai ba dei ban leit jurip lang ia ka jaka kaba don ha Lawsohtun kaba la kynnoh ba ki bor shipai ki la leit klun da kaba pynieng kynroh bad katei ka pynjulor ia ki tyllong um bam um dih jong katei ka shnong.
La shim ia ka rai ba ia katei ka jingleit jurip yn leit lang da ki bor district, bor shnong, bad ki bor shipai. Haba kren sha ki nongthohkhubor u rangbah Shnong bah M Wankhar la iathuh ruh ba ki shipai hapoh ka jingialam u Station Commandant Brig Amrit Lal ki la pan jingbit na ka bor shnong ban shah ia ki ban tei ia ka kynroh “Hynrei ngim shym la ailad bad ngi la ong ba ki dei ban sangeh shisyndon” ong u bah Wankhar.
U bah Sanbor pat u la ong ba ka jingtei kynroh ki shipai ka la pynjulor ia ki tyllong umbam ka Lawsohtun nalor kaba ki la pynpra ia ki paip um bad u la ong ba ka shnong kan dang iai pyrshah ba ki shipai kin tei ia kano kano ka jingtei ha katei ka jaka da kaba kdew ba ka Guwahati High Court ruh ka la pynmih ia ka jingbishar jong ka ha u snem 2007 ba ki shipai kin ym la ban tei kino kino ki jingtei ha katei ka jaka.
Hynrei u la ong ba ha u 2013 kyndit ki shipai ki la sdang ban tei kynroh khlem ka jingtip ki bor district hynrei ma u bad ka dorbar shnong ki la leit ban pynsangeh. U bah Sanbor u la ther ruh ia ka sorkar jylla naba kam shym la pynbna noh ia katei ka jaka ha Lawsohtun kum ki kynja law adong. U bah Sanbor u la byrngem ruh ban leit pyntip sha ka High Court halor katei ka jingbym lah ka sorkar ban pynbna noh kum ka Law Adong naba u la ong ba ka Advisory Committee ka la dep bthah ia ka sorkar ba ka dei ban pynbna noh hapoh 60 sngi katkum ka jingbishar jong ka ia ka PIL ha u 2005 hynrei ka sorkar kam shym la lah satia ban pynbna haduh mynta ruh.