Shah kem ka kmie ba byrngem pyniap ia la ki khun

Jowai, 31 Lber:
Kawei ka longkmie kaba la tip kyrteng kum ka Rishisha Challam kaba na ka shnong Tyrshang, thain Ummulong ka la shah kem ha ki pulit kynthei ka Jowai bad ka iing bishar ka la rai ruh ban set along ia ka haduh 14 sngi khlem jamin na ka daw ba ka la byrngem pyniap ia la ki khun lajong bad ruh ia ka para khadduh kaba dang rit rta.
Katei ka longkmie kadei kaba kyrni bha ha ka jingdih kyiad bad la iathuh ba ha ka 28 tarik une u bnai ka la rah da ka wait ban pyniap ia ki khun jong ka. Ka la leh ia kane hadien ba ka la dep ban bom ban shoh ia la ka jong ka kmie.
Kawei na ki khun jong ka ha ryngkat ka para khadduh jong ka ki la hap ban phetwir bad poi shaduh sha Jowai ban phet iap na ka jingthmu katei ka kmie ban pom pyniap ia ki da ka wait.
Da ka jingiarap jong ki driver bus, ia kitei ki ar ngut kiba la phet na la iing la ialam sha ki pulit ha Jowai bad haba tohkit ia ki, ki la phla lut bad halor ka jingphla jong ki, ki pulit ka nongbah Jowai kila shim khia ban tohkit bad haba ki la lap ia ka jingshisha ki la kem noh ia katei ka longkmie mynta ka sngi da ka jingiarap ka para jong katei ka longkmie kaba la air uh ka jingujor sha ki pulit.
Ia kitei ki khynnah kynthei la aiti ia ki sha ka Childline ha Jowai bad haduh mynta ki dang don ha kti jong ka Childline.