Mynta yn iakren pud U Sonowal bad U Mukul ha Guwahati

Shillong, 31 Lber:
Ka jingiakren pyn-beit pud hapdeng u Myntri Rangbah ka Assam u Sarbananda Sonowal bad u Myntri Rangbah ka Meghalaya u Dr Mukul Sangma kan long lashai ka sngi ha Guwahati por 11 baje mynstep ha Administrative Staff College ha Khanapara, Guwahati.
Kane ka jingiakren pynbeit pud ka dei ka sien kaba 20 ha ka kyrdan Myntri rangbah jong kine ki ar tylli ki jylla naduh ba la kha ia ka Meghalaya.
Ka jingiakren ban pynbeit iakajia pud bad ka Assam ka la iaid naduh u snem 1971 haduh mynta bad naduh u snem 1971, la don 19 sien ba ki Myntri Rangbah ka Meghalaya bad ka Assam ki iakynduh haduh 2012, bad 12 sien ki Chief Secretary.
Ki don 12 tylli ki jaka ba iakajia pud hapdeng ka Meghalaya bad ka Assam kynthup ka Blocks I bad II, Upper Tarabari, Gizang Reserve Forest, Hahim, Langpih, Borduar, Boklapara, Nongwah-Matamur, Khanapara-Pillangkata, Deshdemoreah, Khanduli-Psiar ba Ratacherra. Kine ki jaka ki dei kiba hap ha West Khasi Hills, Jaintia Hills bad ha Ri Bhoi district ka Meghalaya.
Na bynta u Dr Mukul, yn synrang lang ki myntri jongu kynthup Deputy Chief Minister u Dr R.C Laloo, u nongaibuit ka sorkar, Bah D.D Lapang, myntri kam pohiing Bah HDR Lyngdoh, Kong Roshan Warjri bad u Chief Secretary u K.S Kropha bad kiwei.