Sdang jurip biang ia ka jingdon u Mawshun ba dang sah

Shillong, 31 Lber:
Ka Meghalaya Minerals Exporter’s Chamber of Commerce (MMECC) ka pynpaw ia ka jing-sngewnguh ia u myntri rangbah ka jylla u Dr Mukul Sangma, u ba la bat ia la ka jong ka kular kaba u la kren hapoh ka iing dorbar thawain jong ka jylla, ha ka dorbar mang tyngka kaba dang shu dep, ha kaba ula khlei ba ka sorkar kan ialeh katba lah ban iarap ia ki briew kiba trei ha kane ka kam mawshun.
Ka MMECC, ka shim ba dei da ka jingshim khia jong u myntri rangbah ka jylla ba ka tnad khlaw, ka la sdang ban jurip biang ia ka jingdon u mawshun ba dang sah ha ki par jong ki briew khnang ban ai jingbit biang ban shallan ia u, ha kaba la leh lyngba u Forest Officer (DFO) Territorial Shillong bad la dep ban bthah ia kiba trei mawshun ba kin buh ia ki aplikeshon jong ki ban dup lah ban leh ia kaba don kam.
Kane ka lynti kaba ka sorkar ka la leh, lyngba jong ka tnad khlaw, na ka liang jong MMECC, ka long kaba u myntri rangbah ka jylla u la shim ia ka lynti kaba dei ban pynlait ia ki briew kiba im kane ka kam mawshun ba kin ioh ban trei ban ktah bad ha ka juh ka por ban dang ioh ban pynkhreh ia ka plan kaba biang ban tih mawshun bad ban ioh ia ki kot ki sla na ka sorkar.
Ka MMECC ka kyntu ia u DFO, territorial East Khasi Hills District ban pynkloi ia kane ka kam ban pyndep kloi ia ka jingjurip khnang ba kito kiba dang don ia u mawshun ba la dep tih, yn ioh ban shallan noh ha dien ba ka ophis ka la ai ia ka Challan.
Katei ka seng, ka pynpaw ruh ia ka jingsngewnguh ia u nongialam ka liang pyrshah hapoh ka iing dorbar thawain ka jylla u Dr Donkupar Roy, u ba la shim khia ban kren ia kane ka jingeh jong ki paidbah hapoh ka iing dorbar thawain ha kane ka dorbar mang tyngka kaba dang shu kut shen, ha kaba u myntri rangbah ka jylla ruh u la sngap bad shah skhor bad leh ia kaei kaba u la klur hapoh ka iing dorbar.