Tuid ka Petrol, ym long um dih shuh ka Wah Umran

Shillong, 27 Lber:
Ka Joint Action Committee of Social Organizations kaba kynthup ia ka CSWO Umran Dairy Unit, ka CSWO Central Body, Laban, Shillong, Poor People’s Movement (PPM), Hynniewtrep Youth Movement, (HYM), Ri Bhoi People’s Movement (RBPM), ki dkhot ka JAC ryngkat katto katne ki nongshongshnong jong ka Umran Dairy kynthup ruh ki shnong ba marjan, ha ka 27 Tarik Lber 2017, ki la iakynduh ia u Deputy Commissioner, ka Ri Bhoi District, u Shri C. P Gotmare ban pynpaw ia ka jingpyrshah jur ban tei thymmai sa kawei ka Petrol Pump nalor ba lah don lypa artylli ki petrol pump kiba ia jan bha ha kane ka shnong. Ka Commttee ka la kyrpad ia u DC ban pynduh pyndam syndon ia katei ka pump kaba dang iai tei mynta.
Ia ka dorkhas ryngkat ki dur ki dar kaba la suh lang ruh ia ki jingsoi jong shibun ki nongshongshnong kiba pyrshah ia katei ka petrol pump, la aiti ha u DC ban bishar bniah halor katei ka kam bad na ka liang jong u, u la kular ban pyndep noh ia ka jingtohkit hapoh ki khyndiat sngi. Ka Joint Action Committee jong ki Social Organizations kan sa aiti ruh ia katei ka dorkhas sha ka Meghalaya State Pollution Control Board bad sha ka National Green Tribunal. Ha kaba iadei bad kane, ka Committee ka la rai ba lada pyn sahteng ia kane ka jingtohkit, ka Committee kam banse ban shim da kiwei pat ki lad kiba kham tyngeh.
Ha ka jing ujor sha U Deputy Commissioner, ka Ri Bhoi District, kitei ki sengbhalang, ki pyni ruh da ka sakhi, ba ka don ka Petrol, kaba tuid sha katei ka Wah bad kaba la pynlong ba kan nym long shuh kaba bit ban pyndonkam, namar ba ka la tuid da ka Petrol sha katei ka Wah, kaba don ruh ka jaka saitjain. Ha ka dorkhas, la iathuh ba katei ka dei ka wah, kaba pynbiang um dih ia u paidlang ka shnong Nongpoh bad kiwei de ki shnong ba marjan.
Ym tang katta, la iathuh ba ki dohkha dohpnat bad kiwei kiba ju don ha katei ka wah, ha ki por mynshwa mynta ki la jah rngai lut khoit.
Kitei ki seng, ki sngew pyrshah namarkata ia katei ka Petrol Pump, kaba thymmai, kaba dang pynkhreh ban tei da U Rohit Jain bad ki sngew lyngngoh ruh ba kumno u ioh ia ka jingbit ban tei ia katei ka Petrol Pump, kaba don ha syndah jong katei ka Wah.