Ym lah pynkut ka HC ia ka tohkit, na u CEM bad u EM

Shillong, 27 Lber:
Ka kaiphod tohkit jong ka House Committee ba la wanrah mynta ka sngi ha ing dorbar ka la pyni ba katkum ka jinglap jong ka, ka shem jingeh ban pynkut ia ka jingtoh-kit jong ka naba ka la ong ba ym lah ban pynkit-khlieh marwei tang ha u Secretary barim ka KHADC u bah Welljune Syiemlieh halor ki san tylli ki mat ba ka la tohkit bad la kdew ba katei ka kam ka dei kaba eh bha naba la mih kyrteng ruh u CEM ba mynta ka KHADC u bah Pyn-shngaiñ N Syiem bad u EM u bah Antonio War bad donkam ba ia katei ka kam yn bteng da ka ing dorbar bad donkam ruh ban lum ia ka dorbar kyrkieh.
Lah ban kdew ba ki san tylli ki mat ba katei ka komiti ka tohkit ki long ka bai lutksan ba ioh na Byrnihat na ka jaka ba heh 405 sq.ft ha ka dor T.264 tyngka shi sq.ft kumjuh ruh ka bai lutksan namar ka jingshah pynpra ki jingtei ka KHADC, ka jingsei pisa na MRB Nongpoh bad Nongstoin, ka jingthied jaka ka Council ha Mawkyrwat, ka ram sha ka Anderson Structural Construction bad ka jingthung ia ki nongtrei ba shipor ki peon ki cleaner.
Ha ka dorbar pat kaba la long mynta ka sngi ban ia kren na ka bynta katei ka mat u MDC ka UDP na Nongkrem u bah H.S Shylla u la ong ba katei ka ripod yn ym lah hi ruh ban pynkut katba u CEM bad u EM ki dang shong ha ka shuki jong u, “Yn ym lah hi ruh ban pynkut katba kine 2 ngut (EM&CEM) ki dang shong ha ka shuki, kam don jingmut shuh ba ngin dawa ba kin hiar shuki, ki la dei ban sngewthuh hi da ka jingiatip lem” ong u bah Shylla haba kren hapoh Ing Dorbar.
U bah Shylla u la ong ruh ba lada dei ba ki sngewkhia shisha ia katei ka kam ki la dei ban iehnoh beit ia ka shuki ba ki shong mynta khnang ba yn ioh tohkit da kaba khuid namarba katba ki dang shong ha ka shuki yn ym lah ban ioh lut ia ki kot ki sla, “Katba pan ia ki kot ki sla la jubab ba ka don beit sha u CEM- baroh ki don ha ka miej u CEM, lada khein da ka nombar ki lah ban shong jubor ioh lehse ki dei shisha ki snieh hati kumba la kren da u CEM ha ka jingialang ha Laitkor” ong biang u bah Shylla.
Katba ka kong Teilinia Thangkhiew MDC ka HSPDP na Mylliem ka la ong ba u CEM u dei ban shim ia ka jingkitkhlieh halor kine kiei kiei baroh namarba u dei ma u u khlieh duh jong ka Council, “Kum u CEM uba dei u khliehduh, phi la pheil namar ka jingbym lap ia kane, phi hap ban shim ia ka jingkitkhlieh” ong ka kong Teilinia haba kren ha ing dorbar. Ka ing dorbar ka KHADC ka la rai ban rah biang ia katei ka mat sha kawei pat ka dorbar ban ia kren sani bha.