51% ki nong kyndong ki kha khun ha iing

Shillong, 26 Lber:
Kumba 47-51 percent ki longkmie ar met ha kane ka jylla ki kha khun ha la iing bad kim treh ban leit sha hospital, la ong ka kaiphod jong ka Controller and Auditor General (CAG) jong u snemn 2016.
Kane ka dei namar ba ki rukom ai jingsumar jong ka sorkar kim long kiba biang khamtam ha ki jaka nongkyndong lait noh kiba don sha sor ki jaka sumar kiba khama biang.
“47-51 percent ki longkmie ar met ba la rejister kim treh ban leit kha ha hospital bad ki kham lah ban kha ha la iing”, la ong ka kaiphod u CAG.
Kane ka pyni ia ka jingduna ka jingai injek bad ka jingbatai ba thikna na ki briew ka koit ka khiah. “Ka la don ruh ka jingduna ha ka jingsiew ia ki longkmie ba kha khun na ka skhim Janani Suraksha Yojana, ha kaba ki longkmie kim tip bha ia kane namar ba kam don ka jingpynshai paidbah”,la ong ka CAG.
Nalor kiba bun ki jingduna, ka State Health Mission ba khlieh da u Myntri Rangbah ka long tang ka kyrteng khlem don eiei katba ka State Health Society ba khlieh da u Chief Secretary ka shu long thohmut thohmat. Namar kane, kam don ka jingtrei ban jop ia ka thong ba la buh da ka sorkar pdeng, la ong ka kaiphod u CAG.